काठमाडौं । लकडाउनसँगै लम्बिएको ‘क्वारेन्टाइन अभियान नाट्य उत्सव’ को शनिबार नवौं दिन ‘दयालु रूख’ प्रदर्शन गरिँदैछ ।

यो सिलसिल्भर स्टेनले लेखेको बालकथा ‘द गिभिङ ट्री’ को नेपाली परिकल्पना हो । ‘दयालु रूख’ कथा घेराको प्रस्तुतिमा आकांक्षा कार्कीको परिकल्पना र निर्देशनमा बनेको नाटक हो । जुन दुई वर्षअघि कौशी थिएटरमा मञ्चन भइसकेको छ ।

बाल्यकालदेखि नै छन्द कवितासँग आकर्षित निर्देशक कार्कीले यस नाटकमा पनि कविता र संगीतको प्रयोग गरेकी छन् । दुई मुख्य पात्र, एक रूख र एक बालक बीचको सम्बन्धको वरिपरि कथा घुमेको छ । भने बाँकी ६ जना कलाकार कथालाई अघि बढाउन सहयोगीपात्रको भूमिकामा देख्न सकिन्छ ।

नाटककी निर्देशक आकांक्षा कार्कीले मानिस समयअनुसार परिवर्तन हुनुपर्ने आवश्यकताको बोध गर्दै भन्छिन्, “मलाई लाग्थ्यो नाटक भनेको प्रत्यक्ष नाटक घरमा गएरै हेर्नुपर्ने विधा हो । तर, अहिले देश संकटकालबाट गुज्रिरहेका बेला यही नै सही माध्यम भएको छ । नाटक भर्चुअली हेर्न पनि सकिँदो रहेछ ।”

यद्यपि उनले यो संकटकाल चाँडै अन्त्य भई दर्शकसँग प्रत्यक्ष नाटक घरमै भेट्न पाउन भन्ने आशा पनि व्यक्त गरिन् ।

लकडाउनको अवधिमा रंगमञ्चका दर्शकले नाटकबाट टाढा रहन नपरोस् भन्ने उद्देश्यले थिएटर मल–कीर्तिपुर रंगमञ्च र थिएटर सेन्टर फर चिल्ड्रेन (टीसीसी नेपाल) ले संयुक्त रूपमा विश्व रंगमञ्च दिवस २७ मार्च (१४ चैत) बाट यस उत्सव सुरु गरेको थियो । यो महोत्सव अन्तर्गत दर्शकले हरेक दिन साँझ ५ बजे थिएटर मलको फेसबुक पेजमा हेर्न सकिन्छ ।