काठमाडौं । विश्वभर महामारीका रूपमा फैलिएको कोरोनाको असर नेपालमा पनि धेरै परेको छ । कोरोनाको संक्रमण रोक्नका लागि नेपाल सरकारले विगत १२ दिनदेखि देशभर लक डाउनको आह्वान गरेको छ । जसअनुसार सबै मानिसहरू घरबाट बाहिर निस्केका छैनन् । लकडाउनले खेलाडीहरूलाई प्रशिक्षणमा पनि असर परेको छ ।
सबै खेलाडीले हाल घरमै सेल्फ प्रशिक्षण गरिरहेका छन् । सेल्फ प्रशिक्षण गरिरहेका खेलाडीमा कराँते र तेक्वान्दो खेलाडीलाई भने धेरै असर परेको छ । उसो त सबै खेलाडी घरमै प्रशिक्षण गरिरहेका छन् । तर, अन्यभन्दा कराँते र तेक्वान्दोका खेलाडीको पीडा भने फरक छ ।
प्रशिक्षण गर्ने ठाउँमा ठूलो आवाज गर्दै प्रशिक्षण गरेका खेलाडी अहिले घरमा त्यही स्तरको सेल्फ प्रशिक्षण गर्ने अवस्थामा छैनन् । उसो त कराँते र तेक्वान्दोको प्रशिक्षण गर्नका लागि साथी पनि चाहिन्छ ।
“लक डाउनको सुरुआती दिनमा सेल्फ प्रशिक्षण गर्न सकिएन । खेलको स्तर नि कमी हुन्छ जस्तो लागेको थियो । बिस्तारै बानी परे पनि अहिले ‘वर्कआउट’ भइरहेको छ । तर, कराँते खेलका लागि घरमै प्रशिक्षण गर्न सहज हुने रहेनछ,” सागमा कराँतेका स्वर्ण विजेता लक्ष्मण तामाङले भने ।
उता तेक्वान्दोका खेलाडीलाई पनि घरमै प्रशिक्षण गर्न सहज भएको छैन । उनीहरू अहिले घरमा ‘वर्कआउट’मा मात्र सीमित छन् । उनीहरूलाई पनि हाल प्रशिक्षण राम्रोसँग हुन नपाउँदाको चिन्ता छ ।
“पहिला प्रशिक्षण गर्दा साथीहरू हुन्थे उनीहरूसँग सिक्ने सिकाउने दुवै हुन्थ्यो । गुरुहरू पनि हुन्थे । सहज थियो । अहिले घरमै प्रशिक्षण हुन सकेको छैन् । मात्र ‘वर्कआउट’ मात्र भएको छ । प्रशिक्षण भने हुन सकेको छैन,” तेक्वान्दो खेलाडी संगीता बस्यालले भनिन् ।
त्यस्तै सागकी स्वर्ण विजेता खेलाडी कुसुम खड्का पनि लकडाउनले गर्दा घरमा प्रशिक्षण गर्न असहज भएको बताउँछिन् । उनी हाल घरमै छिन । उनको पनि प्रशिक्षण राम्रोसँग भएको छैन । घरभित्र प्रशिक्षण गर्न खोज्दा साथी नहुनु र कराउन नपाउनु उनका लागि मुख्य समस्या भएको छ ।
“यस्तो बेला प्रशिक्षण धेरै आवश्यक छ । घरमै सेल्फ प्रशिक्षण गरौं भन्दा सहज छैन । एकातर्फ कराउन पाइँदैन भने अर्काेतर्फ सँगै प्रशिक्षण गर्नका लागि साथी पनि हुँदैनन् । त्यसैले अहिले सामान्य प्रशिक्षण मात्र भइरहेको छ ।
यस्तै समस्या कराँतेमा सागकी स्वर्ण विजेता संगीता मगरलाई पनि छ । उनी अहिले घरमा सामान्य प्रशिक्षण गरिरहेकी त छन् तर जुन हिसाबको प्रशिक्षण हुनु पर्ने हो त्यो नभएको उनको भनाइ छ । उसै पनि यो समय खेलाडीका लागि प्रशिक्षण धेरै गर्ने समय हो ।
सामान्य प्रशिक्षण भइरहेको छ । साथीहरूसँग भएर प्रशिक्षण गर्दा र घरमै प्रशिक्षण गर्दा धेरै फरक छ । जुन स्तरको प्रशिक्षणको आवश्यकता छ त्यो हुन सकेको छैन,” संगीताले भनिन् ।