कञ्चनपुर । कञ्चनपुरका किसान यतिवेला गहुँ काटनमा व्यस्त छन् ।
गहुँ काटन सुरु गरे पनि गहुँ थ्रेसिङ गर्नका लागि थ्रेसरको अभाव भएपछि उनीहरु सास्ती खेप्न बाध्य भएका छन् । कोरोना भाइरसको सङ्क्रमण रोकथामका लागि सरकारले मुलुकभर लागु गरिएको लकडाउनका कारण केही ट्रयाक्टर सञ्चालकले मात्रै गहुँ थ्रेसिङ गर्दै आएका छन् । बाह्य क्षेत्रबाट गहुँ थ्रेसिङका लागि ट्रयाक्टर ल्याउन निषेध गरिन थालेपछि गहुँ थ्रेसिङ गर्न किसानले सास्ती खेप्नु परेको हो । खेतमा गहुँ पाकिसकेको छ ।
“गहुँ काटन थालेका छौं”, कृष्णपुरका किसान जीवन चौधरीले भने, “गहुँ थ्रेसिङ गर्नका लागि निकै समस्या भएको छ । बाह्य क्षेत्रबाट थ्रेसिङका लागि ट्रयाक्टर ल्याउन नदिँदा समस्या भएको छ ।” बाह्य क्षेत्रबाट थ्रेसिङका लागि ट्रयाक्टर ल्याउँदा त्योसँगै मजदुरहरु पनि आउने भएकाले कोराना भाइरसको सङ्क्रमण हुन सक्ने आशङ्कामा बाह्य क्षेत्रका ट्रयाक्टर निषेध गरिन थालेको बताइएको छ ।
थ्रेसिङको अभाव भएपछि धेरै किसानले लकडाउन खुल्ने आशामा गहुँ काटेका छैनन् । “मुलुक लकडाउन भएका बेला गहुँ थ्रेसिङ गर्न ट्रयाक्टर अभाव भएपछि गहुँ काटेका छैनौं”, स्थानीय किसान वीरबहादुर राजवंशीले भने, “लकडाउन खुलेपछि गहुँ काटने योजना बनाएका छौं । ”
ट्रयाक्टर खोज्न नसक्दा काटेका गहुँ पनि खेतमै थन्क्याउन बाध्य भएका छन्, यहाँका किसान । किसानहरुले स्थानीय तहसँग सहज रुपमा गहुँ थ्रेसिङको व्यवस्था मिलाई दिन र ट्रयाक्टरका लागि इन्धनको व्यवस्था गर्न आग्रह समेत गरेका छन् । रासस
सांकेतिक तस्बिर