काठमाडौं । नोभेल कोरोना भाइरस अर्थात् कोभिड-१९ को संक्रमण तीव्र रुपमा बढ्दै गएको छ । तर, संक्रमितको उपचार पनि सँगसँगै भइरहेको छ ।

नोभेल कोरोना भाइरसका संक्रमितका लागि कोभिड-१९ विरुद्धको खोप विकास नभए पनि लक्षण अनुसारको उपचार र  एन्टिभाइरलको उपचार पद्धतिद्वारा उपाचार गरिरहेको स्वास्थ्य विज्ञहरुले जनाएका छन् । 

विश्‍वभरका ९ लाख ६० हजार कोरोना संक्रमितमध्ये दुई लाख तीन हजार ११४ कोरोना संक्रमितको उपचार गरेर अस्पतालबाट डिस्चार्ज गरिएको वर्ल्ड मिटरको तथ्यांकमा उल्लेख छ । 

त्यसैगरी ४९ हजार १५६ कोरोना संक्रमितको मृत्यु भएको जनाइएको छ । हाल सात लाख सात हजार ७९३ सक्रिय कोरोना संक्रमित रहेका छन् । त्यसमध्ये ३६ हजार २०५ कोरोना संक्रमित गम्भीर रहेको अन्य ६ लाख ७१ हजार ५८८ कोरोना संक्रमितको अवस्था सामान्य रहेको बताइएको छ ।

विश्‍वमा सबैभन्दा बढी कोरोना संक्रमित दुई लाख १५ हजार ३५७ अमेरिकामा छन् भने सबभन्दा बढी कोरोना संक्रमित १३ हजार १५५ को इटालीमा मृत्यु भएको छ । अमेरिकामा पाँच हजार ११३ जनाको मृत्यु भएको छ भने इटालीमा एक लाख १० हजार ५७४ कोरोना संक्रमित छन् । 

स्पेनमा एक लाख १० हजार २३८ कोरोना संक्रमित छन् भने १० हजार तीनजनाको मृत्यु भएको छ । कोरोनाको उद्‌गम राष्ट्र चीनमा भने तीन हजार ३१८ कोरोना संक्रमितको मृत्यु भएको छ भने एक हजार ८६३ सक्रिय कोरोना संक्रमित रहेको र ७६ हजार ४०८ जनाको उपचारपछि अस्पतालबाट डिस्चार्ज गरिएको छ ।