दाङ । कोरोना संक्रमित बिरामीका लागि क्वारेन्टाइन राख्ने विषयमा विवाद भएपछि लमही नगरपालिकाले लमहीको रातोडाँडामा रहेको सहिद नेत्रलाल अभागी स्मृति भवनलाई प्रयोगमा ल्याएको छ ।
नगरपालिकाले क्वारेन्टाइनका लागि देउखुरी बहुमुखी क्याम्पस र बाल जनता माध्यमिक विद्यालय बनगाउँलाई निर्णय गरेको थियो तर गाउँको बीचमा राखेर पूरै गाउँलाई त्रसित पार्न खोजेको भन्दै वडा नम्बर ३ का स्थानीयले विरोध गरेका थिए ।
प्रतिष्ठानको तीन तला भवन कोरोना संक्रमित बिरामीका लागि योग्य भएकाले प्रतिष्ठानसँग कुरा गरेर क्वारेन्टाइनका लागि सहमति लिइएको नगरप्रमुख कुलबहादुर केसीले बताए । क्वारेन्टाइनमा राखिने व्यक्तिहरुका लागि डाक्टर र सुरक्षाकर्मीले पनि पहरा दिने व्यवस्था मिलाइने केसीले बताए ।
क्वारेन्टाइनमा बस्दा उनीहरुलाई कुनै मानसिक तनाब नहोस् भनेर फ्रि वाइफाइको सेवा पनि प्रदान गरिने भएको छ । क्वारेन्टाइनमा बस्दा कसैले पनि कुनै अप्रिय घटना न घटाउन भनेर चौबिसै घण्टा निगरानीमा राखिनेछ ।
क्वारेन्टाइनमा बाहिरबाट आएका नागरिकलाई राख्ने, केही लक्षण देखिए अस्पताल पठाउने नगरप्रमुख केसीले बताए । हाललाई तीस जनाको लागि बेड तयार गरिएको छ । लमही नगरपालिकामा स्थापना गरेको कोरोना राहत कोषमा जम्मा भएको रकमबाट ती व्यक्तिहरुको खानपानमा खर्च गरिनेछ । यस क्वारेन्टाइनमा जेष्ठ नागरिकलाई तल्लो तलामा राखिने भएको छ । त्यस्तै महिला बालबालिका र पुरुषलाई अलग अलग राखिनेछ ।