विराटनगर । नेपाल प्रेस युनियन मोरङले संञ्चारकर्मीहरूलाई कोरोनाबाट सतर्क रहँदै सुरक्षा अपनाउन मास्क, सेनिटाइजरसहितका सामग्री वितरण गरेको छ । 

युनियनका सदस्य तथा अरू सक्रिय पत्रकारहरूलाई कार्यक्षेत्रमा खटिँदा आवश्यक पर्ने एन ९५ मास्क, सर्जिकल मास्क, ग्लोब, सेनिटाइजर, क्याप र किरिङ वितरण गरेको अध्यक्ष कुमार लुइँटेलले जानकारी दिएका छन् । 

मास्क र ग्लोब युनियनले खरिद गरी पत्रकारहरूलाई वितरण गरेको तर थप सेनिटाइजर, क्याप र किरिङ भने फुजीमा आयल कम्पनी प्रा.लि र हिमगिरि हाइजेनिकले सहयोग गरेका हुन् । 

युनियनको मोरङ कार्यालयमा संगठनका अध्यक्ष कुमार लुइँटेल, पूर्व केन्द्रीय उपाध्यक्ष शेखर रेग्मी, पूर्व केन्द्रीय सदस्य शंकर खरेल, निर्वातमान मोरङ युनियनका अध्यक्ष मीनकुमार नवोदितत र सचिव गोपाल पोखरेलले ती सामग्री वितरण गरेका हुन् । वितरण कार्यक्रममा सहभागी भएका नेपाल पत्रकार महासंघ प्रदेश १ का अध्यक्ष विक्रम लुइँटेलले पत्रकारहरूका लागि युनियनले गरेको यो सहयोग सह्रानीय भएको चर्चा गरे । 

तोकिएको दूरीमा रही ती सामग्री पत्रकारहरूलाई भिडभाड नगरी वितरण गरिएको थियो । नेपाल पत्रकार महासंघ मोरङकी उपाध्यक्ष सुशीला पाठक, कार्यसमिति सदस्य कौशल निरौला, प्रेस संगठनका प्रल्हाद गुरागाईंलगायतका सञ्चारकर्मी त्यस अवसरमा सहभागी थिए । पूर्वी मोरङका युनियन सम्बद्ध सक्रिय सञ्चारकर्मीहरूलाई भोलि ती सामग्री प्रदान गर्ने कार्यक्रम रहेको युनियन अध्यक्ष लुइँटेलले जानकारी दिएका छन् ।