मनिला । फिलिपिन्समा स्वास्थ्यकर्मीमाथि आक्रमण हुन थालेपछि प्रहरीले स्कर्टिङ गर्ने भएको छ । फिलिपिन्स केन्द्र सरकारले स्वास्थ्य सुविधाका लागि स्वास्थ्यकर्मीहरुलाई स्कर्टिङ गर्न सूचित गरेको छ ।
फिलिपिन्स न्युज एजेन्सीका अनुसार क्याबिनेट सेक्रेटेरी कार्लो नोग्राल्सले भर्चुअल पत्रकार सम्मलेनका क्रममा बुधबार भने, "स्वास्थ्य संकटका समयमा स्वास्थ्यकर्मीमाथिको सुरक्षामा आँच पुर्याउने काम अस्वीकार्य छ ।"
"स्वास्थ्यकर्मीलाई सहयोग र माया गर्नुको साटो अग्रपंक्तिमा उभिएर मुलुकमा आएको संकटसँग लड्ने उनीहरुमाथि आक्रमणका घटना हुनु दुर्भाग्य हो," उनले थपे ।
फिलिपिनी राष्ट्रिय प्रहरी प्रमुख आर्की जाम्बोआले दक्षिणी प्रान्त सेबु र सुल्तान कुदरतमा स्वास्थ्यकर्मीलाई सुरक्षा प्रदान गर्द निर्देशन जारी गरेका छन् ।
जाम्बोआले भने, "हाम्रा स्वास्थ्यकर्मीमाथि आक्रमणको प्रयास गर्नेलाई कानुनबमोजिम कडाइ गर्न र स्वास्थ्यकर्मीको सुरक्षा प्रदान फिलिपिनी प्रहरी प्रतिबद्ध छ । उनीहरुलाई कुनै पनि किसिमको विभेद, हिंसा, अपराध, दबाब र आक्रमणबाट जोगाउने जिम्मा हामीले लिएका छौं ।"
मार्च २७ मा सेबु प्रान्तमा एक पुरुष नर्समाथि क्लोरिन छर्किएको प्रहरीले जनाएको छ । त्यही दिन सुल्तान कुदरत प्रान्तस्थित एक अस्पतालमा चिकित्सकमाथि पाँच जनाको समूहले आक्रमण गरेको थियो । - सीएनएन