काठमाडौं । स्वास्थ्य तथा जनसंख्या मन्त्रालयले ओबीसीआई प्रालिसँग कोरोना भाइरस नियन्त्रण तथा रोकथामका लागि सामग्री ल्याउन गरिएको सम्झौता रद्द गरेको छ । कम्पनीले सम्झौताभन्दा कम सामग्री आपूर्ति गरेपछि सम्झौता रद्द गरिएको मन्त्रालयले जनाएको छ ।
गत शनिबार आफूहरूले माग गरेकोमध्ये १० प्रतिशत मात्र सामान आएको स्वास्थ्य सेवा विभागका महानिर्देशक महेन्द्र श्रेष्ठले जानकारी दिए । बुधबार गरेको पत्रकार सम्मेलनमा उनले आफूहरूले मागेभन्दा कम सामान आएको हुँदा त्यो कम्पनीसँग गरेको सम्झौता रद्द गरेको जानकारी दिए ।
“भोलि दिनुपर्ने सामान पनि दिने छाँटकाँट नदेखिएपछि हामीले सम्झौता रद्द गरेको हो,” उनले भने, “सम्झौता रद्द गरी धरौटी जफत गर्ने र कालोसूचीको प्रक्रिया अगाडि बढाउने निर्णय भएको छ ।”
मन्त्रालयले ओबीसीआईसँग कोरोना भाइरस रोकथाम र नियन्त्रण लागि चीनबाट विभिन्न स्वास्थ्य सामग्री आपूर्तिका लागि सम्झौता गरेको थियो ।