काठमाडौं । निर्वाचन आयोगले विहिबारदेखि मतदाता परिचयपत्र वितरण सुरु गरेको छ । वैशाख ३१ गते हुने पहिलो चरणको निर्वाचनका लागि विहिबारदेखि मतदाता परिचयपत्र वितरण सुरु गरेको हो । 

मतदानका लागि मतदाता परिचय पत्र आवश्यक पर्ने कानुनी व्यवस्था अनुसार मतदाता परिचय पत्र वितरणको काम सुरु गरिएको प्रमुख निर्वाचन आयुक्त डा. अयोधिप्रसाद यादवले जानकारी दिए । विहिबार, शुक्रबार र शनिवार ३ दिन सम्बन्धित मतदान केन्द्रले मतदाता परिचय पत्र वितरण गर्नेछ । निर्वाचन आयोगले मतदाता परिचय वितरणसँगै मतदात शिक्षा कार्यक्रमको पनि व्यवस्था गरेको छ ।

सम्बन्धित मतदान केन्द्रमा मतदाता शिक्षाका लागि निर्वाचन शिक्षा कार्यकर्ताको समेत व्यवस्था गरिएको प्रमुख निर्वाचन आयुक्त यादवले स्पष्ट पारे । निर्वाचन आयोगले मतदाता परिचय वितरणको समय भने सम्बन्धित मतदान केन्द्रले त्यहाँको परिस्थिति अनुकूल हुने गरी तय गर्ने पनि स्पष्ट पारेको छ ।

निर्वाचन आयोगले सबै निर्वाचन अधिकृतहरु तोकिएको मतदान केन्द्रमा पुगेर मतदान स्थलको व्यवस्थापनमा जुटिसकेको पनि जानकारी दिएको छ । पहिलो चरणको निर्वाचन अन्तरगत प्रदेश नम्बर ३, ४ र ६ नम्बर अन्तरगतको २ सय ८३ वटा स्थानीय तहमा निर्वाचन हुँदैछ । निर्वाचन आयोगले बैशाख ३१ गते विहान ७ बजेदेखि अपरान्ह ५ बजेसम्म मतदान हुने पनि स्पष्ट पारेको छ । मतदान सम्पन्न हुनेवित्तिकै मत गणना गर्ने जिम्मेवारी सम्बन्धित मतदान अधिकृतलाई जिम्मेवारी दिइएको निर्वाचन आयोगले जनाएको छ ।