कोभिड १९ को सङ्क्रमण रोकथामका लागि सडक अवरुद्ध :
कोरोना भाइरसको सङ्क्रमण रोकथाम र न्यूनीकरणका लागि सरकारले लागू गरेको लकडाउन अवधिभर नयाँ मानिस गाउँ प्रवेश नगरून् भन्ने उद्देश्यले नवलपुरको कावासोती नगरपालिका १७, ढोकीका स्थानीयले रूख र ढुंगा राखेर अवरुद्ध गरेको सडक । तस्बिर : रासस
 

कपिलवस्तु । कपिलवस्तुको विजयनगर गाउँपालिकाले विदेशबाट आएका व्यक्तिको घरमा रातो चिह्‍न राखेको छ । 

गाउँपालिकाको  प्रत्येक वडामा सम्बन्धित वडाका जनप्रतिनिधिमार्फत रातो चिह्‍न राख्‍ने काम गरेको हो । कोरोना भाइरस (कोभिड १९) को सङ्क्रमण फैलिने त्रासले सावधानी अपनाउँदै बाहिरबाट आएका व्यक्तिको पहिचान गरी उनीहरुको घरमा रातो चिह्‍न लगाउने कार्य गरिएको विजयनगर गाउँपालिकाका अध्यक्ष गोपालबहादुर थापाले जानकारी दिए ।

भारत वा अन्य मुलुकबाट आएका नागरिकमा कोरोना सङ्क्रमणको उच्च जोखिम रहने भएकाले बाहिरबाट आएका ५ सय जनाको पहिचान भइसकेको र उनीहरुको घर पहिचानका लागि अहिले सम्म ३ सय घरमा रातो चिह्‍न राखिएको गाउँपालिका अध्यक्ष थापाले बताए । उनीहरु सबैलाई क्‍वारेन्टाइनमा राखिएको छ । 

विजयनगर गाउँपालिकाको वडा १ मा ५२, २ मा ६० र ३ मा ५१ जनाको घरमा रातो चिह्‍न लगाइसकिएको छ । वडा ४ मा ५९, ५ मा ७४, ६ मा ३७ र ७ मा ९५ जनाको घरमा रातो चिह्‍न लगाउने कार्य जारी छ । 

गाउँपालिकाले बाहिरबाट आएका व्यक्तिको तथ्यांक संकलन गरेपछि यो अभियान चालेको प्रमुख प्रशासकीय अधिकृत गोविन्द भट्टराईले जानकारी दिए । रातो चिह्‍न राखिएको घरको पहिचान हुनुका साथै सङ्क्रमणबाट सचेत पनि हुने र तथ्यांक संकलनमा सहज हुने उनले बताए । -रासस