लन्डन । बेलायतमा कोरोना संक्रमित पुष्टि भएको १३ वर्षीय किशोरको मृत्यु भएको छ । लन्डन हस्पिटल ट्रष्टका अनुसार साउथ लन्डनस्थित ब्रिक्सटोनमा रहेको किङ्स कलेजको अस्पतालमा सोमबार १३ वर्षीय स्माइल मोहमद अब्दुलवाहाको मृत्यु भएको हो ।
बेलायतमा कोरोना भाइरसको संक्रमणकै कारण मृत्यु हुने कम उमेरका सम्भवत: उनी पहिलो व्यक्ति हुन् । ट्रष्टका प्रवक्ताले ती किशोरको मृत्यु आकस्मिक भएको बताए तर थप विवरण भने दिन चाहेनन् ।
स्माइलको परिवारले उनको मृत्युपछि ठूलो चोट पुगेको बताएका छन् । परिवारका अनुसार स्माइललाई अन्य कुनै स्वास्थ्य अवस्था कमजोर भएपछि अस्पताल भर्ना गरिएको अर्को दिन शुक्रबार जाँचका क्रममा कोरोना पोजेटिभ देखिएको थियो ।
बीबीसी स्वास्थ्य संवाददाता निक ट्रिगलका अनुसार कोरोना भाइरसको संक्रमणबाट गम्भीर बिरामी भएको किशोरको यो विरलै घटनामध्ये एक हो । उनले भने, "अहिलेसम्मको तथ्यांकअनुसार ०.३ प्रतिशत किशोरहरुमात्रै लक्षण देखिएपछि उपचारका लागि अस्पताल भर्ना भएका छन् भने अस्पताल भर्ना भएकामध्ये ०.०६ प्रतिशतको मात्रै मृत्यु भएको छ । अर्थात् ३० हजारभा २ जनाको मात्र यस उमेर समूहका मानिसको मृत्यु भएको छ ।"
अनुसन्धानकर्ताहरुले कोभिड-१९ का कारण बालबालिका र किशोरहरुको मृत्यु हुने जोखिम निकै न्यून हुन्छ । बालबालिकामा निकै हलुका लक्षणहरु देखिन्छन् । - बीबीसी
