काठमाडौं । स्वास्थ्य तथा जनसंख्या मन्त्रालयले र्यापिड परीक्षण गर्ने मापदण्ड विश्व स्वास्थ्य संगठन र नेपाल सरकारभन्दा बाहेक अन्य तरिकाबाट नगर्न निर्देशन दिएको छ । विभिन्न स्थानमा कोरोना भाइरसको परीक्षण गर्ने भन्दै र्यापिड टेस्ट गर्ने क्रम बढेपछि सरकारले कोरोना भाइरस परीक्षण पत्ता लगाउन र्यापिड परीक्षण नगर्न निर्देशन दिएको हो ।
मन्त्रालयका स्वास्थ्य सल्लाहकार डा. खेम कार्कीले विभिन्न स्थानमा र्यापिड टेस्ट गरेको सूचना आएपछि विश्व स्वास्थ्य संगठन र नेपाल सरकारको मापदण्ड विपरीत भएकाले त्यसो नगर्न निर्देशन दिए । उनले सो र्यापिड टेस्टबाट नतिजा सही नआउने हुँदा परीक्षण नगर्न अनुरोध गरे ।
उनले यदि कुनै व्यक्तिलाई र्यापिड टेस्ट गर्दा पोजेटिभ देखिएर पछि नेगेटिभ देखियो भने त्यसले समाज र गाउँमै नकारात्मक असर पार्ने बताए । उनले भने, “सरकारले तोकेको प्रयोगशालाबाट मात्र कोरोना भाइरसको परीक्षण हुन्छ ।”