काठमाडौं । वीर अस्पतालमा उपचारका क्रममा मृत्यु भएका दुवै जनाको कोरोना परिक्षणको रिपोर्ट नेगेटिभ आएको स्वास्थ्य तथा जनसंख्या मन्त्रालयले जनाएको छ ।
मन्त्रालयका प्रवक्ता डा. विकास देवकोटाले सोमबार अस्पतालमा उपचारका क्रममा मृत्यु भएका दुवैको कोरोना नेगेटिभ आएको बताए । “दुवैजनाको सोमबार नमुना संकलन गरेर राष्ट्रिय जनस्वास्थ्य प्रयोगशालामा कोरोना परीक्षणका लागि पठाइएको थियो,” उनले भने, “दुवैको कोरोना परीक्षणको रिपोर्ट नेगेटिभ आएको छ ।”
आइतबार अस्पतालको सघन उपचार कक्ष (आईसीयू) मा उपचाररत महिलाको सोमबार बिहान मृत्यु भएको थियो । उनलाई मधुमेह, उच्चरक्तचाप र ज्वरोको समस्या देखिएको अस्पतालले जनाएको छ ।
त्यसैगरी, सोमबारै ज्वरोलगायत समस्या देखिएर बिहान अस्पतालको आकस्मिक कक्षमा भर्ना भएका पुरुषको उपचारकै क्रममा दिउँसो मृत्यु भएको थियो । ती पुरुष भारतीय नागरिक हुन् । उनी भारतबाट आएको करिब एक सातामात्र भएको थियो ।