काठमाडौं । नेपाली कथानक चलचित्र ‘आमा’ र ‘सेन्टी भाइरस’ यो वर्षका अन्तिम चलचित्र बनेका छन् । सरकारले कोरोना भाइरसको सम्भावित महामारीलाई आंकलन गर्दै चैत अन्तिम हप्तासम्मका लागि लकडाउन गर्ने निर्णय गरेसँगै ‘आमा’ र ‘सेन्टी भाइरस’ यो वर्ष हल रिलिज हुने अन्तिम चलचित्र बनेका हुन् ।
यी दुबै चलचित्र फागुन ९ गते शिवरात्रीको अवसर पारेर एकै दिन रिलिज भएका थिए । रिलिजको दोस्रो हप्ता देखि नै कोरोनाको त्रास बेहोरेका यी चलचित्रले लगानी भने सुरक्षित गरिसकेका थिए । सरकारले सिनेमा हल, क्ल्ब, जिम सेन्टर लगायत भीडभाड हुने ठाउँ बन्द गर्ने निर्णय गर्दा चलचित्र ‘आमा’ हलमै थियो भने ‘सेन्टी भाइरस’ भने उत्रिसकेको थियो ।
‘सेन्टी भाइरस’ भन्दा पनि ‘आमा’लाई कोरोनाको त्रासले बढी प्रभाव पारेको थियो । ‘सेन्टी भाइरस’ले इनिसियल व्यापार राम्रो गरेको थियो भने ‘आमा’ वर्ड आफ माउथले पिक अप लिँदैथियो ।
‘आमा’ अहिले डिशहोममा रिलिज भइरहेको छ । दीपेन्द्र के खनालको लेखन तथा निर्देशन रहेको ‘आमा’मा मिथिला शर्मा, सुरक्षा पन्त, सरिता गिरी र मनिष निरौला मुख्य भूमिकामा थिए भने रामबाबु गुरुङ निर्देशित चलचित्र ‘सेन्टी भाइरस’मा सिताराम कट्टेल, कुञ्जना घिमिरे, दयाहाङ राई, राजाराम पौडेल, विल्सन विक्रम राई, बुद्दि तामाङ लगायत मुख्य भूमिकामा थिए ।