माली । विश्‍वभर कोरोना भाइरसको महामारीलाई रोक्‍ने विभिन्‍न पहल भइरहेका बेला पश्‍चिम अफ्रिकी मुलुक मालीमा भने संसदीय निर्वाचन सुरु भएको छ । 

कोरोना भाइरसका कारण मालीमा पहिलो व्यक्तिको मृत्यु भएकै दिन आइतबार मालीमा निर्वाचन सुरु भएको हो । एक दिनअघि अर्थात् शनिबार प्रमुख विपक्षी दलका नेता सोउमाइला सिसेलाई अज्ञात बन्दुकधारीले अपहरण गरेका थिए । 

यस निर्वाचनबाट राष्ट्रिय सभाका १४७ सांसदको चयन गरिनेछ । सन् २०१३ पछि हुन लागेको यो पहिलो निर्वाचन हो । सन् २०१३ मा राष्ट्रपति इब्राहिम बोउबाकर केइटाको पार्टीले भारी महुमतका साथ विजयी भएको थियो । 

संसदीय निर्वाचन हरेक पाँच वर्ष अर्थात् सन् २०१८ मा हुनुपर्ने भए पनि सुरक्षा कारण देखाउँदै धेरै पटक स्थगित गरिएको छ । आइतबार पहिलो चरणको मतदान हुँदै छ भने दोस्रो चरणको मतदान अप्रिल १९ मा हुने तय गरिएको छ । 

मालीमा हालसम्म १८ जना कोरोना संक्रमित देखिएका छन् भने निर्वाचन हुनुभन्दा केही घण्टा अघि पहिलो कोरोना संक्रमितको मृत्यु भएको थियो ।  मालीबाट विस्थापित भएका करिब दुई लाख मतदाताले भने मतदान गर्न नपाउने भएका छन् । 

यहाँ विद्रोही समूह र कोरोना भाइरस दुवै त्रासका कारण राष्ट्रिय आपतकालको स्थिति रहेको अलजजिराले जनाएको छ । तर, बुधबार राष्ट्रपति केइटाले राष्ट्रिय शान्ति र संवादका लागि निर्वाचन गर्नै पर्ने बताएका थिए । - अलजजिरा