बेल्जियम । चीनको वुहानबाट सुरु भएको नोभेल कोरोना भाइरसले मानवलाई त्रसित बनाइरहेका बेला पहिलोपटक बेल्जियममा घरमा पालिएको बिरालोमा पनि कोरोना संक्रमण भएको पुष्टि गरिएको छ । बेल्जियमका स्वास्थ्य अधिकारीहरुले कोरोना संक्रमित मालिकबाट बिरालोमा कोरोना भाइरसको संक्रमण भएको बताएको हफिङ्‌टन पोस्टले जनाएको छ । 

"भर्खरै लिगस्थित भेटेनरी चिकित्सा विभागले बिरालोमा कोरोना भाइरसको संक्रमण पुष्टि गरेका हुन्," भाइरोलोजिस्ट स्टेभेन भान गाउचले संघीय जनस्वास्थ्य सेवामा आयोजित पत्रकार सम्मेलनमा भने । ब्रसेल्स टाइम्सले लेखेको छ, "बिरालो आफ्नो मालिकसँग बस्दै आएको थियो । बिरोलोलाई लक्षण देखिनुभन्दा एक साता अघि मालिकलाई पनि कोरोना लक्षण देखिएको थियो ।" 

बिरालोलाई झाडापखाला, बान्ता र श्वासप्रश्‍वासमा समस्या भएको र अनुसन्धानकर्ताहरुले बिरोलोको दिसा जाँच गर्दा कोरोना भएको पुष्टि गरेका हुन् । शनिबार बिरालो र मालिक दुवैको अवस्था ठीक रहेको जनाइएको छ । "यो एक फरक केस भएकामा हामी जोड दिन चाहन्छौं," भान गाउचले भने, " यो केस मानवबाट जनवारमा पनि कोरोना संक्रमण हुन्छ भन्‍ने कुरा पत्ता लागेको छ । जनावारबाट मानव संक्रमण हुने जोखिम निकै कम छ ।" 

यसअघि हङकङमा दुई कुकुरमा भाइरस संक्रमण भएको थियो । जसमध्ये एउटामा संक्रमण भएको र लक्षण देखिएको थिएन । तर, अहिले देखिएको बिरालोमा भने भाइरसको संक्रमण पनि भएको लक्षण पनि देखिएका छन् । 

"अहिलेसम्म जनावरबाट मानिसमा संक्रमण भएको कुनै प्रमाण फेला परेको छैन । तर, एक व्यक्तिबाट अर्को व्यक्तिमा सरेको छ । जनावरबाट मानिसका सरेको भन्‍ने आधार छैन," क्यालिफोर्निया विश्वविद्यालयको भेटेरिनरी मेडिकल विभागका प्रमुख ज्यान साइक्सले भनिन् । उनले कुकुर र बिरालो कोरोना संक्रमित हुनसक्ने भएपनि उनीहरुलाई मानिसलाई संक्रमित बनाउन नसक्‍ने साइक्सले बताइन् ।