नयाँ दिल्ली । भारतमा नोभेल कोरोना भाइरससम्बन्धी जनचेतना जगाउन नयाँ तरिका अपनाइएको छ ।
ट्राफिक प्रहरीले कोरोना भाइरससम्बन्धी सडकमा हिँडिरहेका मानिसहरुलाई जनचेतना जगाउन नयाँ तरिका अपनाएका छन् ।
केही दिनअघि भारतमा सडकमा हिँडिरहेका मानिसहरुलाई प्रहरीले कुटेको र मुर्गा बनाएका भिडियोहरु भाइरल भएका थिए । तर, हाल प्रहरीले कोरोना भाइरससम्बन्धी जनचेतना जगाउन कोरोनाजस्तो देखिने गरी हेल्मेट सजाएर कोरोनाको संक्रमणसम्बन्धी जानकारी गराउन थालेका छन् ।
ट्राफिक प्रहरीले कोरोना भाइरसको संक्रमण बढिरहेकोले यसरी सडकमा नहिँडन सुझाइएको छ ।
चेन्नईमा एकजना ट्राफिक प्रहरी राजेश बाबुले भने, "हामीले मानिसहरुलाई कुट्ने र गाली गर्नेभन्दा पनि उनीहरुलाई कोरोना कस्तो हुन्छ र यो कसरी फैलाउँछ भन्ने बुझाउन कोरोनाजस्तो देखिने हेल्मेट बनाएर सम्झाइरहेका छौं ।"
उनले यस्तो किसिमको हेल्मेट लगाएका उनीहरुमा डर पैदा हुने बताए ।
भारतमा हालसम्म कोरोना संक्रमितको संख्या ९१८ पुगेको छ भने १९ जनाको मृत्यु भएको भारतीय स्वास्थ्य मन्त्रालयले जानकारी गराएको छ । -रोयटर्स