काठमाडौं । कोरोना भाइरस (कोभिड–१९)को जोखिम कम गर्न सरकारले लकडाउन गरेको आज पाचौं दिन हो । लकडाउनमा अत्यावश्यक सेवाका सवारीसाधन चल्न दिएको सरकारले विहान बेलुका कही समयका लागि तरकारी तथा खाद्यवस्तुका पसल पनि खोल्न भनेको छ ।
नागरिकको स्वास्थ्यलाई ध्यान दिँदै आजबाट लकडाउनमा नागरिकलाई अत्यावश्यक कामबाहेक घर बाहिर निस्किन नदिन प्रहरीले थप कडा गर्ने भएको छ । यसका लागि प्रहरीले विशेष टोली नै बनाएर परिचालन गर्ने भएको छ ।
जनस्वास्थ्यका लागि कोरोनाको संक्रमण फैलिन नदिन सरकारले नागरिकलाई बाहिर ननिस्किन भने पनि झुक्याएर जनता बाहिर निस्किरहेको प्रहरीले जनाएको छ । लकडाउन सफल बनाउन ठूलो संख्यामा प्रहरी परिचालित छ ।
यद्यपि एकाध व्यक्तिले लकडाउन उल्लंघन गरे पनि सडक सुनसान छन् । नेपालमा आजसम्म चार जनामा कोरोना भाइरसको संक्रमण भेटिएको छ । संक्रण हुने सबै विदेशबाट नेपाल फर्किएका नेपाली नागरिक हुन् । चीनबाट सुरु भएको कोरोनाबाट अहिलेसम्म २७ हजारभन्दा धेरैको ज्यान गइसकेको छ ।
