न्युयोर्क । संयुक्त राष्ट्र संघको सुरक्षा परिषद बैठकमा नोभेल कोरोना भाइरस अर्थात कोभिड-१९ को विषयमा छलफल गर्न राखिएको प्रस्ताव रद्द गरिएको छ । करिब २४ हजारभन्दा बढी मानिसको मृत्यु भएको, शान्त विश्वलाई त्रसित बनाउनुका साथै विश्वको सुरक्षा चुनौती बनेको विषय कोभिड-१९ का विषयमा राष्ट्र संघको सुरक्षा परिषद् बैठकमा छलफल हुन सकेन । 

कोरोना भाइरसको उद्‌गम थलो रहेको चीन मार्च ३१ सम्म सुरक्षा परिषदको अध्यक्ष राष्ट्र हो । कूटनीतिक स्रोतका अनुसार रुस र दक्षिण अफ्रिकाले कोरोना भाइर र विश्वशान्ति र सुरक्षाबीच कुनै लिंक नभएको बताएपछि चीनले कोरोना भाइरसको विषयमा राखिएको प्रस्ताव रद्द गरेको हो । 

रुस र दक्षिण अफ्रिका चीनका व्यापार साझेदार हुन् । इस्टोनियन (युरोपेली मुलुकका प्रतिनिधि) कोभिड-१९ प्रकोपको पारदर्शीबारे छलफल गर्नसमेत प्रस्ताव गरेका थिए । 

एक कूटनीतिज्ञले भने, "संयुक्त राष्ट्रसंघका स्थायी सदस्य राष्ट्रले यसको समाधान र सीमा खोल्‍ने विषयमा गभ्मीरताका साथ छलफल गर्न चाहेनन् ।" 

यसअघिका प्रकोप इबोलाका समयमा सन् २०१४ मा यसको प्रभाव र समाधानका विषयमा संयुक्त राष्ट्र संघको सुरक्षा परिषद्‍मा छलफल भएको थियो । साउदी अरेबियाको नेतृत्वमा बिहीबार भएको जी-२० राष्ट्र सम्मेलनमा पनि संयुक्त राष्ट्र संघमा यस विषयलाई उठाउने सम्बन्धमा कसैले पनि कुरा उठाएनन् । -हिन्दुस्तान टाइम्स