एजेन्सी । संयुक्त राज्य अमेरिकामा विश्वमै धेरै नोभेल कोरोना भाइरस अर्थात कोभिड-१९ का संक्रमित फेला परेका छन् । चीनको वुहानबाट सुरु भएको नोभेल कोरोना भाइरसका संक्रमित अमेरिकामा धेरै फेला परेका हुन् ।
चीनमा हालसम्म ८१ हजार ७८२ कोरोना संक्रमित छन् भने अमेरिकामा ८५ हजारभन्दा बढी कोरोना संक्रमित भेटिएको जोन हप्किन्स विश्वविद्यालयले जनाएको छ । त्यसैगरी इटालीमा ८० हजार ५८९ कोरोना संक्रमित फेला परेका छन् ।
अमेरिकामा हालसम्म १३ सय कोरोना संक्रमितको मृत्यु भएको छ भने चीनमा तीन हजार २९१ संक्रमितको मृत्यु भएको छ भने इटालीमा ८ हजार २१५ को मृत्यु भएको छ । यसअघि राष्ट्रपति डोनाल्ड ट्रम्पले चाँडै कोरोनाबाट मुक्त हुने काममा फर्किने बताएका थिए ।
तर, हाल विश्वकै धेरै कोरोना संक्रमित भेटिएपछि अमेरिकी राष्ट्रपति ट्रम्पले अमेरिकामा कोरोना संक्रमितको संख्या धेरै हुनुको कारण 'टेस्टिङको नतिजा' भएको बताएका छन् । उनले पत्रकार सम्मेलनमा भने, "हामीले अधिक मात्रामा परीक्षण गरेका छौँ र धेरै संक्रमित भेटिएका हुन् ।"
उनले कोरोना भाइरसको उद्गमस्थल रहेको चीनले तथ्यांक लुकाएको आरोपसमेत लगाए । "चीनले कोरोनाको संक्रमणको जुन तथ्यांक बाहिर देखाएको छ, त्यो सत्य होइन । चीनमा संक्रमितको संख्या तथ्यांकमा देखाइएको भन्दा अधिक छ," उनले भने ।
अमेरिकी उपराष्ट्रपति माइक पिनेकले ५० राज्यमा कोरोनाको संक्रमण भेटिएका छन् भने ५ लाख ५२ हजारको कोरोना जाँच गरिएको छ । अमेरिकामा पछिल्लो २४ घण्टामा १४ हजार ९९५ जनामा नयाँ संक्रमण पुष्टि भएपछि अमेरिका विश्वमै सबैभन्दा धेरै कोरोना भाइरस संक्रमित हुने मुलुक बनेको हो ।
विश्वभर अहिलेसम्म ५ लाख २९ हजार १४८ जनामा कोरोना भाइरसको संक्रमण पुष्टि भएको छ । त्यसमध्ये २३ हजार ९६८ जनाको मृत्यु भएको छ । अहिलेसम्म एक लाख २३ हजार ३८० जना निको भएर घर फर्किएका छन् । - बीबीसी