काठमाडौं । भेनेजुएलाका राष्ट्रपति निकोदस मदुरोमाथि अमेरिकी प्रशासनले बिहीवार विधिवत् लागू पदार्थ आतंकवाद (नार्को टेरोरिज्म) को अभियोग लगाएको छ । द वासिङटन पोस्टको अनलाइन संस्करणमा प्रकाशित समाचारअनुसार समाजवादी अधिनायक मदुरोलाई सत्ताबाट हटाउने अमेरिकी सरकारको प्रयास यसरी नाटकीय चरणमा प्रवेश गरेको हो ।
अमेरिकी अधिकारीहरूले मदुरोमाथिको अभियोगको तयारी एक दशकदेखि भइरहेको बताएका छन् । राष्ट्रपति मदुरोलाई अपदस्थ गर्न भइरहेको जनआन्दोलन कोरोनाभाइरसको संक्रमणका कारण शिथिल हुँदै गएको बेला अमेरिकी सरकारको आरोप सार्वजनिक भएको हो ।
अमेरिकामा डोनाल्ड ट्रम्प राष्ट्रपति चुनिएदेखि नै मदुरोलाई हटाउने प्रयास तीव्र भएको छ । राष्ट्रपति मदुरो र उनको सरकारका अधिकारीहरू लक्षित प्रतिबन्धको अमेरिकाले घोषणा गरिसकेको छ । यसैगरी अमेरिकाले लगाएको आर्थिक प्रतिबन्धले भेनेजुएलाको अर्थतन्त्र तहसनहस भएको पोस्टको समाचारमा उल्लेख गरिएको छ ।