काठमाडौं । सिङगिङ रियालिटी–सो ‘नेपाल आइडल’ सिजन–३ केही समयका लागि स्थगित भएको छ । विश्वभर फैलिएको कोरोना भाइरस (कोभिड–१९)को जोखिम न्यूनिकरणलाई ध्यान दिँदै नेपाल आइडललेकेही समय नयाँ कार्यक्रम उत्पादन तथा प्रशारण नगर्ने भएको हो । 

अवस्था सामान्य नभएसम्म अब अडिसन राउन्डका श्रृंखलाहरु प्रशारण हुने भएको छ । कोरोना भाइरस नियन्त्रणमा आएपछि नयाँ श्रृंखलाको उत्पादन तथा प्रशारण सुरु गरिने नेपाल आइडलले जनाएको छ । 
प्रतिस्पर्धीलाई आआफ्नै घर पुर्याएको नेपाल आइडल निर्देशक सुरेश पौडेलले जानकारी दिए । 

गत हप्ता उत्कृष्ठ दशबाट बाहिरिएका प्रतिस्पर्धीले वाइल्ड कार्ड इन्ट्रीका लागि प्रतिस्पर्धा गरेका थिए ।  वाइल्ड कार्ड इन्ट्रीका लागि मेघा श्रेष्ठ, किरण भुजेल, ममता गुरुङ, रचना रिमाल र मिङ्मा लामाले आआफ्नो प्रस्तुती दिएका थिए । मुस्कान रानाभाट भने परीक्षाको तयारी भन्दै वाइल्ड कार्ड इन्ट्रीमा सहभागी भइनन् । 

केभिन ग्लान तामाङ, प्रवीण बेडुवाल, नेसन पुन मगर  र सज्जा चौलागाईं भने उत्कृष्ट चारमा प्रवेश गरिसकेका छन् । 

वाइल्ड कार्ड इन्ट्रीबाट एक जना पुनः प्रवेश गरेपछि  पाँच जनाबीच प्रतिस्पर्धा हुने छ । 

नेपाल आइडलमा विगतमा झैं यो सिजनमा पनि न्ह्यू वज्राचार्य, कालीप्रसाद बास्कोटा र इन्दिरा जोशी निर्णायक छन् ।

नेपाल आइडल सिजन–३ का विजेताले नगद रु. ५० लाख प्राप्त गर्ने छन् । फष्ट रनरअपले १० लाख पाउँदा सेकेन्ड रनरअपले ५ लाख प्राप्त गर्नेछन् । उत्कृष्ट तीन जनाले वल्र्ड टुरको अवसर पाउने छन् ।