काठमाडौं । यौनशोषण र बलात्कारको मुद्दामा जेलमा रहेका हलिउड निर्माता हार्वी वाइनस्टिन कोरोना संक्रमित भएका छन् ।
न्युयोर्क राज्य सुधार अधिकारी र प्रहरी हितकारी संघका अध्यक्ष माइकल पावरका अनुसार उनी अहिले जेलभित्र आइसोलेसनमा छन् ।
उनी गत महिना मात्रै यौनशोषण र बलात्कारको मुद्दामा २३ वर्षको जेल सजायमा परेका हुन् ।
६८ वर्षका वाइनस्टिनमा आइताबार परिक्षण गराउँदा कोरोना पोजेटिभ देखिएको हो ।
गत बुधबारमात्रै उनलाई न्यु योर्क सिटी जेलबाट बुफालो जेलमा सारीएको थियो । योभन्दा अघि रिकर्स आइल्यान्ड जेलमा रहेका उनमा छातिमा समस्या देखिएपछि म्यानहट्टन अस्पतालमा उपचारको लागि राखिएको थियो ।
कोरोना भाइरसका कारण मृत्युदर बढेसँगै अमेरिकाको ठूलाठूला सहर अहिले ‘लकडाउन’ गरिएको छ । तथ्यांकका अनुसार अमेरिकामा भाइरसका कारण ४०० बढि व्यक्तिको मृत्यु भइसकेको छ भने ३३ हजार भन्दा धेरै व्यक्तिहरु संक्रमित भइसकेका छन् । - बीबीसी
