चीनको वुहानमा कोरोनाभाइरसको संक्रमण सुरु हुनेबित्तिकै जनस्वास्थ्य विशेषज्ञहरू नेपालमा संकटको सम्भावना औँल्याएका थिए । अधिकांश सञ्चार माध्यमले जनस्वास्थ्य र संक्रामक रोगका विज्ञहरूका भनाइ सार्वजनिक पनि गरेका थिए । सरकारका मन्त्रीहरू विज्ञहरू र जनताको आवाज मुखरित गर्ने सञ्चारकर्मीलाई होच्याउँदै नेपाल कोरोना मुक्त देश भएको प्रचारमा लागे । अहिले सामान्यतः देखिएको वा सुनिएको भन्दा अवस्था निकै गम्भीर भएको छ । सुरक्षा उपकरण, चिकित्सा सामग्री तथा औषधिलगायत अत्यावश्यक वस्तुका अभावमा अहिले स्वास्थ्यकर्मीहरू सबैभन्दा बढी संक्रमणको जोखिममा परेका छन् । दुर्भाग्य, अझै पनि देशका स्वास्थ्यमन्त्रीको आँखा खुलेको रहेनछ । संक्रमणको रोकथामका लागि खटिने चिकित्साकर्मीलाई वैयक्तिक सुरक्षा कवच (पीपीई) उपलब्ध हुनुपर्ने अनिवार्य प्रावधानलाई समेत स्वास्थ्यमन्त्रीले बेवास्ता गरेका सबैले सुने । सुन्नेहरू अधिकांशले मन्त्रीलाई धिक्कारे पनि ।

हुनत, आफ्नै ज्यान जोखिममा पर्ने जान्दाजान्दै पनि संक्रमणको पहिचान, रोकथाम र उपचारका लागि चिकित्साकर्मीहरू खटिएकै छन् । समाजले यिनलाई स्याबास भनेको छ । भन्नै पर्छ । तर, यिनको सुरक्षामा हेलचेक्य्राइँ हुँदा चिकित्साकर्मीहरूमात्रै जोखिममा पर्दैनन् उनीहरूको सम्पर्कमा आउने अरू बिरामी र तिनको परिवारजनसमेत संक्रमणको जोखिममा पर्छन् । सामान्य विवेक भएको कुनै व्यक्तिले पनि चिकित्सकहरूको वैयक्तिक सुरक्षाको विषयलाई उपेक्षा गर्न सक्तैन । यसैले स्वास्थ्य तथा जनसंख्यामन्त्री भानुभक्त ढकालको कथन दुःखदमात्र हैन आपत्तिजनक पनि हो । जनताप्रति उत्तरदायी हुनुपर्छ भन्ने संस्कार शासकमा जन्मेको भए यस्तो गम्भीर अवस्थामा संवेदनहीन अभिव्यक्ति दिने व्यक्ति पदबाट मुक्त भइसक्थ्यो । शासकको कृपापात्रलाई पदमा रहन जिम्मेवार हुनु नपर्ने संस्कार राणाकालभन्दा पनि पुरानो हो । नेपालीको नियतिमा सायद यस्तैको शासन लेखेको छ ।

सरकारमा भएका सबैजना भानुभक्त ढकाल प्रवृत्तिका पक्कै छैनन् होला । प्रधानमन्त्री केपी ओलीले आफ्नो स्वास्थ्यको समेत ख्याल नराखी बैठकहरू चलाएका छन् र देशका लागि आवश्यक निर्णयहरू लिएका छन् । उपप्रधानमन्त्री ईश्वर पोखरेलको संयोजकत्वको समितिले ढिलै भए पनि अत्यावश्यक बन्दाबन्दीको निर्णय लियो । बिस्तारै जनताले त्यसलाई स्वीकार गर्दैछन् । यसैले पीपीईलगायतका चिकित्सा सामग्रीको आपूर्तिमा स्वास्थ्यमन्त्री ढकालजसरी सरकारको सबै निकाय गैरजिम्मेवार बन्नेछैन भन्ने अपेक्षा गरिएको हो । कच्चा पदार्थ भएमा देशभित्रैको जनशक्ति र सीप प्रयोग गरेर वैयक्तिक सुरक्षा कवच उत्पादन गर्न सकिने देखिएको छ । यस्तै, पशुपंक्षीको सरुवा रोग परीक्षणका लागि तयार गरिएको प्रयोगशालामा सामान्य सुधार गरेर पनि प्रयोग गर्न सकिने जानकारी सार्वजनिक भएको छ । प्रधानमन्त्री ओली र उपप्रधानमन्त्री पोखरेलको ध्यान भानुभक्तहरूको अकर्मण्य र गैरजिम्मेवार प्रवृत्तितर्फ हैन संकटका बेला सहयोग गर्न अग्रसर विज्ञ र उद्यमीहरूको कुरा सुन्नेतर्फ जानुपर्छ । कोरोनाभाइरसविरुद्धको युद्ध गैरजिम्मेवार र अकर्मण्य व्यक्तिहरूबाट जित्न सकिँदैन । बेलैमा चेतौँ ।