फुजहोउ । १४ जनाको चिकित्सा विज्ञको टोली बुधबार चीनको फुजियान प्रान्तबाट चार्टड विमानमार्फत् युरोपियन राष्ट्र इटालीका लागि उडेको छ । कोरोना भाइरसले सबभन्दा बढी प्रभावित मुलुक इटालीमा सहयोगका लागि उडेको यो तेस्रो चिनियाँ टोली हो । 

उक्त टोलीमा विभिन्‍न अस्पतालका चिकित्सकहरु र चीनक रोग नियन्त्रण, उपचार केन्द्र फुजियानका प्रतिनिधि, राष्ट्रिय रोग नियन्त्रण केन्द्रका इपिडिमियोलोजिस्ट र अन्हुइ प्रान्तका पल्मोनोलोजिस्ट रहेको पिपुल्स डेली चाइनाले जनाएको छ । 

टोलीमा गएकाहरु श्वासप्रश्वास, आईसीयू, संक्रामक रोग, अस्पताल संक्रमण नियन्त्रण, परम्परागत चिनियाँ औषधी र नर्सिङ क्षेत्रका विज्ञहरु रहेको बताइएको छ । उनीहरुको मिसन कोभिड-१९ को नियन्त्रण, रोकथाम र उपचारमा आफ्नो अनुभव त्यहाँका स्थानीय अस्पताल र विज्ञहरुलाई बाँड्‍नु रहेको छ । 

इटालीको टुस्क्यानी क्षेत्रमा खटिने उनीहरुले आवश्यक सुरक्षा सामग्रीसमेत उपलब्ध गराइने जनाइएको छ । उनीहरुले साथमा ८ टन बराबरको मेडिकल उपकरणहरु पनि साथमा लगेका छन् । 

यसअघि चीनले २२ जनाको दुई टोली र २० टन मेडिकल सामग्री इटाली पठाएको थियो । इटालीमा कोरोनाबाट हालसम्म ७ हजार ५०३ जनाको मृत्यु भएको छ भने ७४ हजारभन्दा बढी संक्रमित भएका छन् । - पिपुल्स डेली चाइना