मड्रिड । स्‍पेनमा नोभेल कोरोना भाइरसबाट मृत्यु हुनेको संख्या चीनभन्दा बढी पुगेको छ । 

युरोपेली मुलुक स्पेनमा २४ घण्टामा ७३८ जनाको मृत्यु भएको अलजजिराले जनाएको छ । विश्‍वमा कोरोनाबाट ज्यान गुमाउनेमा इटालीपछि स्पेन रहेको छ । 

स्पेनमा कोरोना संक्रमणबाट मृत्यु हुनेको संख्या तीन हजार ४३४ पुगेको छ भने चीनमा हालसम्म तीन हजार २८१ को मृत्यु भएको छ । 

हालसम्म कोरोनाबाट सबभन्दा धेरै इटालीमा ६ हजार ८२० को मृत्यु भएको छ । 

अमेरिकामा कोरोनाबाट मर्नेको संख्या ७८५ मात्रै भए पनि संक्रमितहरुको संख्या भने तीव्ररुपमा वृद्धि भइरहेको छ । अमेरिकामा ५५ हजार ८१ संक्रमित छन् भने स्पेनमा ४७ हजार ६१० रहेको वर्ल्ड मिटरले जनाएको छ । 

इटालीमा ६९ हजार १७६ संक्रमित छन् भने चीनमा ८१ हजार २१८ संक्रमित भएका छन् ।  चीनमा ७३ हजार ६५० कोरोना संक्रमितको उपचार गरिएको छ ।