संसारलाई कोरोना भाइरसले त्रस्त बनाइरहेका बखत हन्ता भाइरस नामको अर्को चिन्ता थपिन पुगेको छ । चीनमा हन्ता भाइरसका कारण २३ तारिख एक जनाको मृत्यु भएपछि यो खबर फैलिन पुगेको हो ।
ग्लोबल टाइम्सका अनुसार हन्ता भाइरस सङ्क्रमित व्यक्ति बसमा सवार थिए, सो बसमा रहेका ३२ जनाको जाँच गरिएको थियो । तर मुख्य कुरा, हन्ता कसरी फैलन्छ भन्ने बुझ्नु जरी छ । प्रमुख कुरो हन्ता भाइरस मानिसबाट मानिसमा सर्दैन । एक रिपोर्टअनुसार यो मुसाबाट फैलन्छ । कुनै मानिसले मुसाको मलमूत्र या त्यसबाट उत्पन्न वस्तु हातले छोएपछि सर्ने सम्भावना रहन्छ । तर यो एक व्यक्तिमा लागेपछि अर्कोमा सर्दैन । हन्ता परीक्षण गर्न एकदेखि आठ सातासम्म लाग्न सक्छ ।
हन्ता सङ्क्रमित व्यक्तिलाई ज्वरो, जिउ दुख्ने, खोकी, घाँटी दुख्ने, बान्ता हुने हुन सक्छ । हन्ता सङ्क्रमितको अवस्था बिग्रँदै जाँदा फोक्सोमा पानी भरिने र स्वास लिन गाह्रो हुन्छ । जनवरी २०१९ मा हन्ता सङ्क्रमित नौ जनाको पेटागोनियामा मृत्यु भएको थियो । त्यसपछि उक्त क्षेत्रमा पर्यटक आवागमन रोकिएको थियो ।
त्यस बखत हन्ता भाइरस सङ्क्रमित भनिएका ६० जनामध्ये ५० लाई क्वारेन्टाइनमा राखिएको थियो । एक अध्ययनका अनुसार हन्ता भाइरसको मृत्युदर ३८ प्रतिशत रहेको र यसको उपचारका निम्ति हालसम्म कुनै ‘स्पेसिफिक ट्रिटमेन्ट‘ पत्ता लागेको छैन । (बीबीसी)