नयाँ दिल्ली । नोभेल कोरोना भाइरसको संक्रमण नियन्त्रणको प्रयास स्वरुप भारतमा तीन साताका लागि लकडाउन घोषणा गरिएको छ । मंगलबार मध्यरातिदेखि सुरु भएको लकडाउनमा मानिसहरुले आफूलाई आवश्यक उपभोग्य सामानहरु किनमेल गर्नेको पीडादायी भीड विभिन्न बजारहरुमा लागेको थियो ।
सुपरमार्केट, फार्मेसीहरु र अन्य आवश्यक उपभोग्य वस्तु पाइने पसलहरुमा मध्यरातिसम्म मानिसहरुको भीड लागेको थियो ।
मंगलबार साँझ प्रधानमन्त्री नरेन्द्र मोदीले आजदेखि भारतमा पूर्ण लकडाउनको घोषणा गरेका थिए । यस लकडाउनको अवधिभर के-के खुल्छन् भनेर मन्त्रालयले विज्ञप्ति जारी गरेको छ ।
जसअन्तर्गत :
- खाना, फलफूल, दाल, तरकारीलगायतका उपभोग्य सामानका पसलहरु खुला रहनेछन् । यद्पि विभिन्न जिल्लाका अधिकारीहरुले यसलाई घरमै डेलिभरि गर्ने व्यवस्था मिलाउन प्रेरित गरिएकोप छ ।
- बैंक, बिमा कार्यालयहरु र एटीएम
- छापा र विद्युतीय सञ्चामाध्यम
- पेट्रोल पम्प
ती पसलहरु कुन-कुन दिन कुन समयमा खुल्ने भन्ने विषयमा विभिन्न जिल्लाका अधिकारीहरुले नियम बनाएर लागु गराउने बताइएको छ ।
भारतमा हालसम्म कोरोना संक्रमणबाट ५०० भन्दा बढी संक्रमित भएका छन् भने १० जनाको मृत्यु भइसकेको छ ।
