वाशिङ्टन । संयुक्त राज्य अमेरिकाले घातको दिनको सामना गर्नुपरेको छ । हालसम्म अमेरिकामा नोभेल कोरोना भाइरसबाट मृत्यु हुनेको संख्या ८०० पुगेको छ ।
विश्व स्वास्थ्य संगठनले संक्रमण निकै तीव्र गतिमा भइरहेको उल्लेख गर्दै अमेरिका विश्वको कोरोना महामारीको अर्को इपिसेन्टर बन्नसक्ने बताएको छ ।
विश्व स्वास्थ्य संगठनले पहिलो इपिसेन्टर पहिलो पटक नोभेल कोरोना भाइरस देखिएको चीनलाई मानेको थियो । त्यसपछि कोरोनाबाट अहिलेसम्मको धेरै मानिसहरु मृत्यु भएकोले युरोपको इटालीलाई इपिसेन्टर बनेको थियो ।
अमेरिका कोरोना प्रकोपको सुरुआती चरणमा छ । स्वास्थ्य अधिकारीहरुले आगामी सातासम्म अमेरिकाको अवस्था निकै खराब भइसक्ने चेतावनी दिएका छन् । न्युयोर्कका गर्भनर एन्ड्रियु कोमोले राज्यमा संक्रमितको संख्या निकै बढिरहेको बताएका छन् ।
संयुक्त राज्यभर करिब ५५ हजारलाई संक्रमण भएको छ । त्यसमा सबैभन्दा बढी न्युयोर्क र क्यालिफोर्निया बढी संकटमा छन् । अमेरिकाका धेरै राज्यहरुले लकडाउन घोषणा गरेका छन् भने अधिकांश राज्यहरुमा घरबाट बाहिर ननिस्किन आदेश जारी गरिएको छ । - बीबीसी
