मड्रिड । नोभेल कोरोना भाइरसले विश्वलाई नै त्रसित बनाइरहेको छ भने युरोपका इटाली र स्पेनमा संक्रमण तीव्र रुपमा फैलिरहेको छ । स्पेनमा कोरोना भाइरसविरुद्ध लड्न सेनासमेत परिचालन गरिएको छ । सेनाले विभिन्न केयर सेन्टरहरुमा संक्रमित वृद्धवृद्धाहरु बेवारिसे अवस्थामा छोडेको र कतिपय अवस्थामा बेडमै मृत फेला पारेको छ ।
स्पेनी रक्षा मन्त्री मार्गरिटा रोबल्सले सोमबार विभिन्न आराम कक्ष तथा केयर सेन्टरहरुलाई स्यानिटाइज् (संक्रमणरहित बनाउन सरसफाइ गर्ने) सेना परिचालन गरिएकोमा वृद्धवृद्धाका बेवारिसे शवहरु भेटाएको बताएका छन् । उनले मंगलबार केही वृद्धवृद्धाहरुलाई संक्रमित अवस्थामै छोडिएको र केहीको बेडमै मृत्यु भएको पाइएको बताएका हुन् ।
स्पेनी अभियोजकर्ताहरुले त्यसरी बेवारिसे वृद्धवृद्धाहरुलाई छोड्नेहरुलाई लापरबाही गरेको आरोपमा कारबाही गर्ने विषयमा निर्णय गर्नेछन् । उनीहरुले यस विषयमा अनुसन्धान थालेका छन् । कोरोना भाइरसको संक्रमण इटालीभन्दा पनि तीव्र रुपमा फैलिरहेको तथ्यांकहरु सार्वजनिक भइरहेका बेला अनुसन्धान थालिएको हो ।
कोरोना भाइरसको संक्रमण चीन, इटालीपछि स्पेनमा तीव्र रुपमा फैलिरहेको छ । स्पेनमा कोरोना संक्रमितको संख्या करिब ४० हजार पुगेको छ । मंगलबारसम्म कोरोनाबाट स्पेनमा करिब २७ सयको मृत्यु भएको छ । मंगलबार स्पेन सरकारले अहिलेसम्मको उच्च मृत्यु भएको बताएको थियो । जसअनुसार २४ घण्टाको अवधिमा ५१४ जनाको मृत्यु भएको थियो । जुन अघिल्लो दिनको भन्दा १९ प्रतिशतले वृद्धि हो ।
स्पेनी टेलिभिज टेलिसिनकोसँगको अन्तर्वार्ताका क्रममा रक्षामन्त्री रोबल्सले भने, "यसरी ती घरहरुमा वृद्ववृद्धालाई त्यसरी छोड्नेविरुद्ध कठोर कारबाही गरिन्छ ।"
"सेनाले विभिन्न ठाउँहरुमा संक्रमित अवस्थाका वृद्धवृद्धाहरु र कतिपय ठाउँहरुमा उनीहरुकै बेडमा मृत अवस्थामा फेला पारेको थियो," उनले थपे ।
स्पेनी सेना र नेभीलाई रिटायरमेन्ट घरहरुलाई संक्रमण निर्मुलीकरण गर्न आग्रह गरिएको छ । त्यसक्रममा देशभरका विभिन्न ठाउँहरुमा दर्जनौं वृद्वृद्धाहरु मृत अवस्थामा फेला परेका हुन् ।
मड्रिडस्थित शवगृहहरु भरिएर अधिकारीहरुले थप शवहरुलाई आइस रिंकमा राख्न दबाब दिइएको छ । "जब मैले रक्षामन्त्रीबाट यस्तो समाचार सुने, म निकै डराएको थिए," संघीय आवासीय गृह कम्पनीका प्रमुख इगानिको फर्नान्डेज-सिडले अलजजिरसँग भने ।
"दाहसंस्कार लागि निकै भिडभाड भएको हामीलाई बताइएको थियो । जसका कारण उनीहरु आएर शव उठाउन नसकेको हुनसक्छ । त्यसकारण उनीहरुले संक्रमणको तीव्रतालाई कम गर्न शव यतिकै उनीहरुको बेडमै छोडेको हुनसक्छ," उनले भने ।
लुइस सिओनका ८९ वर्षीय बुबा कोरोना संक्रमणका कारण मड्रिडस्थित अस्पतालमा छन् । उनका बुबा मोन्टे हेर्मोसो आवासगृहमा बस्थे । जहाँ गत साता अन्य २० जनाको कोरोना संक्रमणकै कारण मृत्यु भएको थियो ।
"मेरो बुबा जुनसुकै समयमा पनि मर्न सक्नुहुन्थ्यो । उहाँ निकै कमजोर हुनुभएको थियो । उहाँ बसेको गृहमा धेरै मानिसहरु संक्रमणकै कारण मृत्यु भएको थियो । उनीहरुले शव यतिकै छोडेकोमा मलाई खासै आश्चार्य लागेन । किनकी यो स्थिति नियन्त्रण बाहिर छ," लुइसले भने ।
स्पेनका स्वास्थ्यमन्त्री साल्भाडोर इलाले आवासगृहहरु सरकारको मुख्य प्राथमिकतामा रहेको बताएका छन् । उनले भने, "हामीले यस्ता आवासगृहमा विशेष निगरानी गर्ने व्यवस्था मिलाएका छौं ।"
सरकारी कोरोना भाइरस निर्देशनअनुसार स्वास्थ्यकर्मीहरुलाई चिकित्सक नआउन्जेसम्म शव त्यही छोड्न भनिएको छ । यद्पि अधिकांश अस्पतालहरुमा संक्रमितको संख्या बढेसँगै शव व्यवस्थापनमा अझै केही समय लाग्नेछ ।
स्पेनको इपिडिमियोलोजीका अधिकारका अनुसार पछिल्ला तीन दिनमा संक्रमितको संख्या दोब्बर भएको छ ।
इटालीमा ८० प्रतिशत संक्रमितहरु तीन राज्यहरु लोमबार्डी, भेनेटो र इमिलिया-रोमाग्नामा देखिएका छन् भने स्पेनमा पनि तीन क्षेत्रहरु कोरोनाबाट बढी प्रभावित भएका छन् । जसमा राजधानी मड्रिड, ला रिओजा र बास्की रहेका छन् । - अलजजिरा
