काठमाडौं । सिङगिङ रियालिटी–सो ‘नेपाल आइडल’ सिजन–३ केही समयका लागि स्थगित हुने भएको छ । विश्वभर फैलिएको कोरोना भाइरस (कोभिड–१९)को जोखिम न्यूनिकरणलाई ध्यान दिँदै नेपाल आइडल केही समय प्रशारण नहुने भएको हो ।
“सरकारले गरेको लकडाउनलाई सहयोग गर्दै हामीले पनि अवस्था सामान्य नहुञ्जेलसम्मका लागि रोक्ने भएका छौं,” नेपाल आइडलका निर्देशक सुरेश पौडेल बाह्रखरीसँग भन्छन्, “यो बिहीबारको श्रृंखलामा निर्णायकको केही सन्देश र प्रतिस्पर्धीलाई शुुभकामना दिएपछि अवस्था सामान्य नभएसम्मका लागि स्थगित गर्नेछौं ।”
प्रतिस्पर्धीलाई हिजो साँझ आआफ्नै घर पुर्याएको निर्देशक पौडेलले जानकारी दिए ।
गत हप्ता उत्कृष्ठ दशबाट बाहिरिएका प्रतिस्पर्धीले वाइल्ड कार्ड इन्ट्रीका लागि प्रतिस्पर्धा गरेका थिए । वाइल्ड कार्ड इन्ट्रीका लागि मेघा श्रेष्ठ, किरण भुजेल, ममता गुरुङ, रचना रिमाल र मिङ्मा लामाले आआफ्नो प्रस्तुती दिएका थिए । मुस्कान रानाभाट भने परीक्षाको तयारी भन्दै वाइल्ड कार्ड इन्ट्रीमा सहभागी भइनन् ।
केभिन ग्लान तामाङ, प्रवीण बेडुवाल, नेसन पुन मगर र सज्जा चौलागाईं भने उत्कृष्ट चारमा प्रवेश गरिसकेका छन् ।
वाइल्ड कार्ड इन्ट्रीबाट एक जना पुनः प्रवेश गरेपछि पाँच जनाबीच प्रतिस्पर्धा हुने छ ।
नेपाल आइडलमा विगतमा झैं यो सिजनमा पनि न्ह्यू वज्राचार्य, कालीप्रसाद बास्कोटा र इन्दिरा जोशी निर्णायक छन् ।
नेपाल आइडल सिजन–३ का विजेताले नगद रु. ५० लाख प्राप्त गर्ने छन् । फष्ट रनरअपले १० लाख पाउँदा सेकेन्ड रनरअपले ५ लाख प्राप्त गर्नेछन् । उत्कृष्ट तीन जनाले वल्र्ड टुरको अवसर पाउने छन् ।