काठमाडौं । विगत सात दिनदेखि भैंसेपाटीस्थित होमस्टेको एक घरमा क्वारेन्टाइनमा बसिरहेका गायक दीपक वज्रचार्य र उनको रिदम ब्यान्डले त्यहींबाटै दर्शकलाई मनोरञ्जन दिन थालेका छन् ।
दीपकको अफिसियल फेसबुक पेजबाट ब्यान्डले लाइभ प्रस्तुति दिन थालेका हुन् । सोमबारदेखि सुरु गरेको भर्चुअल लाइभ प्रस्तुति आज पनि चल्यो ।
दीपकले फेसबुक पेजमार्फत मंगलबार ३ बजे आफ्नो ब्यान्ड लाइभ आउने जानकारी दिएका थिए । उनले लेखेका छन्, “यो गाह्रो परिस्थितिमा हामी सबै सकारात्मक बनौं, आफ्नो मान्छेसँगै बसौं र खुसी बसी आफ्नो र परिवारको ख्याल राखौँ ।”
फेसबुक लाइभमा गीत गाउने मात्रै भन्दा पनि एक-अर्कासँग कुराकानी पनि गर्ने उद्देश्यसँगै यस्तो अवस्थामा पनि नआतिई मनलाई केही छिन भएपनि मनोरञ्जन दिने प्रयत्न गरिरहेको दीपकले बताए ।
उनले लकडाउनमा परिचालित सबै सेना तथा प्रहरीलाई धन्यवाद पनि दिएका छन् ।
