चितवन । सरकारको निर्णयको अवज्ञा गर्ने १० जनालाई प्रहरीले नियन्त्रणमा लिएको छ ।
आज बिहानैदेखि लकडाउनको अवज्ञा गर्दै मानिसहरू अत्यावश्यक कामबाहेक नै घरबाट बाहिर निस्किएपछि प्रहरीले यस्तो कदम चालेको हो । नियन्त्रणमा लिइएका केहीलाई सम्झाई बुझाई पठाइएको र केहीलाई जरिवानाका लागि जिल्ला प्रशासन कार्यालय पठाइएको चितवनका प्रहरी प्रमुख नान्तिराज गुरुङले जानकारी दिए ।
चितवनमा अवज्ञाको गर्ने क्रम बढेपछि जिल्लाका मुख्य क्षेत्रमा बिहानैदेखि सुरक्षाकर्मी तैनाथ गरिएको छ । कोरोना रोकथाम तथा नियन्त्रणका लागि सरकारले मंगलबार बिहान ६ बजेदेखि लकडाउन गरेको हो । उपप्रधानमन्त्री तथा रक्षामन्त्री ईश्वर पोखरेलको संयोजकत्वमा रहेको कोभिड १९ संक्रमण रोकथाम तथा नियन्त्रण उच्चस्तरीय समन्वय समितिको सोमबार बसेको बैठकले देशभर लक डाउन गर्ने निर्णय गरेको थियो ।