एजेन्सी । दक्षिण अमेरिकी मुलुक भेनेजुएलाले लामो समयदेखि आर्थिक संकटको सामना गरिरहेको छ । अहिले फेरि विश्वभर आतंक फैलाइरहेको नोभेल कोरोना भाइरसको विश्वव्यापी महामारीको सामना गर्नुपरेको छ ।
मार्च १७ देखि लकडाउन घोषणा गरेको भेनेजुएलाले सम्पूर्ण सीमानाका बन्द गरेको छ भने अन्तर्राष्ट्रिय उडानहरु रद्द गरिएका छन् । आर्थिक संकटमा परेको भेनेजुएलामा कोरोनाको अवस्थाबाहेकमा समेत पर्याप्त खाना र औषधिको अभाव हुने यस मुलुकमा कोरोना संक्रमणको अवस्थामा भोग्नुपर्ने संकट निकै दयनीय छ ।
मुलुकभरका जनतालाई घरबाट बाहिर ननिस्किन निर्देशन जारी गरिएको छ । मानिसहरुलाई खाना र औषधि खरिदका लागि र संक्रमणको शंका लागे अथवा संक्रमितको उपचारका लागि अस्पताल जानबाहेक सम्पूर्ण आवतजावतमा प्रतिबन्ध लगाइएको छ ।
आइतबारदेखि घरमा बस्दा पनि अनिवार्य मास्क र पञ्जा लगाउनुपर्ने बताइएको छ ।
एक ५० वर्षीय सरकारी कर्मचारीले भने, "कोरोना भाइरसको संक्रमण तीव्ररुपमा फैलिने त्रासले अहिले जनताहरु निकै चिन्तित भएका छन् । त्यसकारण उनीहरुले होम-क्वारेन्टाइनको अवस्थालाई पालना गरेका छन् । तर, केही फुटपातका व्यापारीहरुले भने साँझबिहान छाक टार्न बाहिर निस्किनैपर्ने बाध्यता छ । सडकभर प्रहरी परिचालन गरिएको छ । जसले गर्दा उनीहरुलाई घरबाहिर निस्किन दिइएको छैन । भोकमरी हुने सम्भावना बढ्दो ।"
उनले सातामा दुईपटक पानी ल्याउँछन् । बाँकी दिन त्यही जम्मा भएको पानी उमालेर पिउने गर्छन् । "हामीले सातामा दुईपटक आउने पानीलाई जम्मा गरेर हात धुनेदेखि पिउनेसम्म गरिरहेका छौं ।"
भेनेजुएलामा हालसम्म ८४ जनालाई कोरोना संक्रमण भएको छ भने १५ जनालाई उपचारपछि घर पठाइएको छ । - बीबीसी