काठमाडौं । काठमाडौंमा लकडाउन (बन्दाबन्दी)को असर देखिएको छ ।
काठमाडौंमै कोरोना सङ्क्रमित फेला परेपछि चनाखो बनेको सरकारले मंगलबारबाट देशभर हप्ताव्यापी बन्दाबन्दी गर्ने निर्णयमा पुगेको थियो ।
कोरोनाको सन्त्रासबाट गत डिसेम्बरदेखि नै गुज्रँदै आए पनि नेपालीहरूले पहिलोपल्ट लडडाउनको सामना गरेका हुन् ।
लडडाउनको असर काठमाडौंमा देखिएको छ । अत्यावश्यक सेवा बाहेकका सबै बन्दव्यापार, आवागमन बन्द छ । खाद्यान्न, दूग्ध पदार्थ, इन्धन आपूर्ति बाहेकका पसलहरू खुलेका छैनन् ।
बन्दाबन्दी अटेर गरेर बाहिर निस्किएका सर्वसाधारणहरूलाई सम्झाइबुझाइ गर्न प्रहरीलाई हम्मे नै परिरहेको छ ।
उपत्यकाका मुख्य, चोकमा बाक्लो मात्रामा सुरक्षाकर्मी परिचालन गरिएको भए पनि अटेर गर्नेको सङ्ख्या उत्तिकै छ । प्रातः भ्रमणमा निस्किएका तन्नेरी मात्र होइन प्रौढहरूलाई नै सम्झाउन प्रहरीहरूलाई हम्मेहम्मे परिरहेको देखिन्थ्यो ।
सुरक्षाकर्मीको आँखा छलेर बत्तिइरहेका मोटरसाइकलमा सवारहरूलाई प्रहरीले हातै जोडेर बिन्ती बिसाइरहेका छन् ।
ठाउँठाउँमा हातमा सूचनामूलक सन्देशसहितका प्लेकार्ड बोकेका सुरक्षाकर्मीहरूले सर्वसाधारणहरूलाई घरमै बस्न, अत्यावश्यक काम परेमात्रै बाहिर निस्कन अपिल गरिरहेका छन् ।
गौशाला, चाबहिल, बौद्ध, जोरपाटी लगायतका क्षेत्रमा बिहान ४ बजेदेखि नै सुरक्षाकर्मीले माइकिङ गरेका थिए । सबै नागरिकहरू घरभित्रै बसेर कोरोना रोकथाम र नियन्त्रणका लागि योगदान पुर्याउन उनीहरूको अनुरोध थियो । अटेर गरे ६ महिनादेखि १ वर्षसम्मको जेल सजाय हुन सक्ने चेतावनी पनि दिएका थिए ।
इतिहासमै पहिलोपटक बन्दाबन्दी, पूर्णतः लकडाउनको सामना गरेकाले सर्वसाधारणले अनौठो मानिरहेका छन् ।
इतिहासका विभिन्न कालखण्डमा औलो, बिफर, कालाज्वर आदि विभिन्न महामारी, व्याधी, प्रकोपसँग जुध्दै आए पनि सर्वसाधारणले यसप्रकारको चौतर्फी बन्दको सामना गर्नुपरेको थिएन ।
