लन्डन । बेलायतका प्रधानमन्त्री बोरिस जोन्सनले नोभेल कोरोना भाइरस नियन्त्रणको पहलका लागि कडा प्रतिबन्ध जारी गरेका छन् । प्रधानमन्त्री जोन्सनले अत्यावश्यकबाहेकका सेवा दिने पसलहरु बन्द गर्न, दुईजनाभन्दा बढी मानिस भेला हुन नपाइने घोषणा गरेका हुन् ।
हालसम्म बेलायतमा कोरोना संक्रमणबाट ३३५ जनाको मृत्यु भइसकेको छ । प्रधानमन्त्री जोन्सनले जारी गरेको प्रतिबन्ध अन्तर्गत दिनमा एकपटक मात्र व्यायामका लागि घरबाहिर निस्किन पाइने, अत्यावश्यकबाहेक आवतजावत गर्न नपाइने, अत्यावश्यक उपभोग्य वस्तुको खरिद र औषधोउपचारका लागि मात्र बाहिर निस्किन पाइने भएको छ ।
यदि मानिसहरुले सरकारको नियम उल्लंघन गरे प्रहरी परिचालन गरेर नियम पालना गर्न बाध्य बनाइने र नमानेमा जरिवाना गर्न तथा भिड तितरवितर पार्ने अधिकार प्रहरीलाई दिइएको प्रधानमन्त्री जोन्सनले १०डाउनिङ् स्ट्रिटमार्फत सन्देश जारी गरेका हुन् ।
प्रधानमन्त्री जोन्सनले मुलुकले राष्ट्रिय आपतकालको अवस्था भोगिरहेको छ र राष्ट्रिय स्वास्थ्य सेवालाई सुरक्षित राख्न र जीवन बचाउनका लागि घरमै बस्नु अत्यावश्यक भएको बताए ।
उनले उक्त प्रतिबन्ध कम्तिमा तीन सातासम्म कायम रहने र त्यसपछि फेरि स्थितिको समीक्षा गरेर थप निर्णय गर्न सकिने बताए । सरकारले चारवटा कारणमात्र घरबाहिर निस्किन निर्देशन जारी गरेको छ ।
- अत्यावश्यक वस्तुको खाना तथा औषधि खरिद ।
- दिनमा एकपटक व्यायाम जस्तै दौडिने, हिँड्ने, साइकल चलाउने । यस्तो अभ्यास एक्लै गर्नुपर्ने तथा आफूसँगै बस्ने व्यक्तिबाहेक अरुसँग गर्न नहुने ।
- संक्रमणको जोखिममा रहेका व्यक्तिको हेरचाह र उचारका लागि ।
- घरमै बसेर गर्न नसकिने कामका लागि कार्यालय जान र आउन ।
- बीबीसी