काठमाडौं । चीनले मेडिकल सुरक्षा सामग्री, पर्सनल, प्रोटेक्टिभ ईक्विपमेन्ट (पीपीई) सहयोग गर्ने भएको छ । नेपालमा एकजना १९ वर्षीया किशोरी कोरोना भाइरस सङ्क्रमणमा परेकी छिन् ।
अरू आशंकितहरू पनि थपिएका छन् । तर, मेडिकल सुरक्षा सामग्रीहरू प्रयाप्त छैनन् ।
पराराष्ट्र मन्त्री प्रदीप ज्ञवालीले झण्डै २० हजार थान त्यस्ता सामग्री (पीपीई) माग गरेको र चीन सरकारले सहयोग गर्ने बताएको जानकारी दिए ।
“उहाँहरूले सहयोग गर्छौं भन्नुभएको छ । सामग्री कहिले आइपुग्छ यकिन भएको छैन,” उनले बाह्रखरीसँग कुरा गर्दै भने ।
त्यस्तै सरकारले २० जना चिकित्सकको समूह पठाउन पनि चीन सरकारसँग अनुरोध गरेको छ । यसमा पनि चीन सरकार सकारात्मक रहेको छ ।
चीनबाट चिकित्सकका टोली भित्रिएपछि उनीहरूले उपचारका अतिरिक्त नेपाली चिकित्सकलाई तालिम पनि दिने छन् ।
सरकारले बलम्बुमा रहेको एपीएफको अस्पताललाई कोरोना उपचार केन्द्र बनाउन खाली गर्ने बताइसकेको छ ।
यसअघि पालका लागि चिनियाँ राजदूत होउ यान्कीले नेपाललाई सहयोग गर्न चिकित्सा सामाग्रिको बन्दोबस्त गर्ने कोशिस गरिरहेको बताएकी छन् ।
राजदूत यान्कीले ट्विटरमार्फत् नेपालको लागि आफूहरुले पनि प्राथना गरिरहेको र मेडिकल सामाग्रि उपलब्ध गराउन समन्वय गरिरहेको बताएकी हुन् ।
उनले भनेकी छन्, “तपाईंहरु कहिल्यै एक्लो हुनुहुन्न ।”