पोखरा । चैत ४ गते फ्रान्सबाट फर्किएकी १९ वर्षीया किशोरीको आइतबार स्वास्थ्य परीक्षण गर्दा कोरोनाभाइरस पोजेटिभ पाइए पछि उनीसँगै जहाजमा आएका बाग्लुङका युवालाई क्वारेन्टाइनमा राखिने भएको छ । 
ती युवा बाग्लुङको ढोरपाटन नगरपालिकास्थित अधिकारीचौरका हुन् ।

संक्रमित किशोरीको उपचार टेकुस्थित शुक्रराज ट्रपिकल तथा सरुवा रोग अस्पतालमा भइरहेको छ । उनीहरु चैत ४ गते कतारको दोहा ट्रान्जिट हुँदै काठमाडौं आएकी थिइन् ।

उनी कतारबाट आएर एक रात काठमाडाैं बसेर भोलिपल्ट गृह जिल्ला प्रस्थान गरेका थिए । 

अहिले उनी आफ्नै गाउँमा छन् । गाउँ आएका युवा कोरोना संक्रमण भएकी किशोरीसँगै आएको खबरपछि गाउँले थप त्रस्त बनेका छन् । 

घरमा रहेका ती युवालाई पैदल यात्रामार्फत आज बुर्तिबाङ बजारमा ल्याइने ढोरपाटन नगरपालिकाका मेयर देवकुमार नेपालीले बताए । 

उनलाई वडाध्यक्ष मार्फत बुर्तिबाङ बजार ल्याएर क्वारेन्टाइनमा राखेर परीक्षण, उपचार लगायत अरु प्रक्रिया अघि बढाउने मेयर नेपालीले जनाए ।