काठमाडौं । कोरोना भाइरसको संक्रमणको महामारीबाट जोगिन सरकारले आजदेखि लकडाउन सुरु गरेको छ ।

मानिसहरुलाई घर बाहिर निस्कन नदिने र अत्यावश्यक सेवा मात्रै सञ्चालन गर्न दिने सरकारले निर्णय गरेको छ ।

काठमाडौं, ललितपुर र भक्तपुरमा मंगलबार बिहान अत्यावश्यक सेवा सञ्चालनका सवारी साधन बाहेकका सवारी साधन सञ्चालन भएको देखिएन । बिहानै सडकमा निस्किएका केही सवारीलाई प्रहरीले फर्काइदिएको छ ।

उपत्यकाको मंगलबार बिहानको दृश्य लगभग कर्फ्युको जस्तै थियो । माइकिङबाट प्रहरीले सर्वसाधरणलाई भित्रै बस्न, घर बाहिर ननिस्कन आग्रह गर्दै हिँडेको छ ।

सडकमा सुरक्षाकर्मी बाक्लो परिचालन गरिएको छ भने सवारी साधनको र परिचयपत्रको चेकजाँचलाई पनि कडाइ गरिएको छ । 

कोरोना संक्रमणको बिरामी फेला परेपछि थप संक्रमण नफैलियोस् भनि सोमबार सरकारले संक्रामक रोग ऐन २०२० अनुसार एकसाताका लागि मुलुकभर लकडाउनको घोषणा गरेको हो । 

मंगलबार बिहान ६ बजे देखि १८ गते सम्म अत्यावश्यक बाहेक सर्वसाधारणलाई घर बाहिर निस्कन निषेध गरिएको छ ।