नयाँदिल्ली । भारतका नोभेल कोरोना भाइरस अर्थात् कोभिड-१९ बाट संक्रमितको संख्या ४१५ पुगेको छ । 

भारतको स्वास्थ्य मन्त्रालयका उपसचिव लाल अग्रवालले सोमबार पत्रकार सम्मेलन गरेर कोरोनाबाट ७ जनाको मृत्यु र ४१५ जना संक्रमित भएको जानकारी गराएका हुन् । उनले भने, "हालसम्म ४१५ जना भारतभर कोरोनाको संक्रमण देखिएको छ । जसमा ७ जनाको मृत्यु भएको छ भने २३ बिरामीलाई उपचारपछि डिस्चार्ज गरिएको छ ।" 

भारतका १९ राज्य तथा संघीय भू-भागहरुमा पूर्ण लकडाउन घोषणा गरिएकोसमेत जानकारी दिएका छन् । 

त्यसैगरी भारतको काउन्सिल अफ मेडिकल रिसर्चमा १२ ल्याबरेटोरी ल्याब दर्ता भएर काम थालिएकोसमेत जनाएको छ । यी १२ ल्याबले देशभरका १५ हजार नमुना संकलन केन्द्रबाट नमुना संकलन गरेर परीक्षण थाल्ने बताइएको छ । 

आइतबार ३६० जनाका कोरोना संक्रमण भएको स्वास्थ्य मन्त्रालयले जनाएको छ । -एएनआई