चितवन । कोरोना भाइरस (कोभिड–१९) को संक्रमणबाट जोगिन बाहिरी जिल्लाबाट आएका सार्वजनिक सवारीसाधनलाई चितवन प्रवेशमा रोक लगाइएको छ ।

सरकारले सोमबारदेखि लामो दूरीको सार्वजनिक सवारीसाधन सञ्चालनमा रोक लगाएपछि अन्य जिल्लाबाट आएका सार्वजनिक सवारी साधनहरूलाई चितवन प्रवेशमा रोक लगाइएको हो । 

चितवन प्रवेश गर्ने मुख्य नाकाहरूमा प्रहरी तैनाथ गरी बाहिरी जिल्लाबाट आएका यात्रुवाहक बसहरूलाई जिल्ला प्रवेशमा रोक लगाइएको जिल्ला ट्राफिक प्रहरी कार्यालय चितवनका प्रमुख प्रहरी निरीक्षक दयाकृष्ण भट्टले बताए । 

चितवन प्रवेश गर्ने मुख्य नाकाहरू लोथर, पुलचोक, मुग्लिङ र मौवा खोलामा चेकप्वाइन्ट राखेर अन्य जिल्लाबाट आएका सार्वजनिक सवारीसाधनलाई जिल्ला प्रवेशमा रोक लगाइएको हो । निजी सवारीसाधन र मालवाहक साधनहरू भने सञ्चालन गर्न दिइएको छ । त्यस्तै चितवनबाट बाहिरी जिल्लाका लागि छुट्ने लामो दूरीको सार्वजनिक सवारीसाधन सञ्चालनमा समेत रोक लगाइएको छ ।