काठमाडौं । कोभिड–१९ (कोरोनाभाइरस)ले विश्वव्यापी रूप लिए पनि नेपालमा अहिलेसम्म यसका सङ्क्रमित छैनन् । प्रारम्भिक जाँचपड्तालका क्रममा पर्साका व्यापारीमा कोरोनाको लक्षण देखिए पनि परीक्षण गर्दा कोरोनाभाइरसको सङ्क्रमण नरहेको पटना अस्पतालले जनाएको छ ।

कोरोना सङ्क्रमण भित्रिइहाले र डढेलोझैं फैलिइहाले रोकथामाका लागि सरकारको पूर्वतयारीबारे प्रश्न उठिरहेका बेला सरकारले आवश्यक तयारी गरेको बताएको छ ।

नेपालमा एकजनामात्र सङ्क्रमित फेला परे सरकारले सशस्त्र प्रहरीको अस्पताल पूरै खाली गरेर कोरोना उपचार केन्द्रमा बदल्ने तयारी गरेको छ ।

“कोरोना भित्रन नदिन सावधानी अपनाए पनि कदाचित् फैलिइहाले सरकारको तयारी फितलो छ भन्ने जताततै टिप्पणी सुनिन्छ,” कोरोना रोकथाम, नियन्त्रण उच्चस्तरीय समन्वय समिति स्रोतले बाह्रखरीसँग भन्यो, “नेपालमा कोरोना सङ्क्रमित छैनन् । एकजनामा पनि सङ्क्रमण फैलियो भने हामी सशस्त्र प्रहरी बलको अस्पताल खाली गराउने तयारी गरिसकेका छौं । त्यहाँ अहिले भइरहेका बिरामी र आउन सक्ने सबै बिरामी सैनिक अस्पताल सिफ्ट (स्थानान्तरण) गरिनेछ । एपीएफको अस्पताललाई कोरोना रोग उपचार केन्द्र बनाउने हाम्रो तयारी छ ।”

कोरोना सङ्क्रमणबाट बच्न चिकित्सक, नर्स लगायतले प्रयोग गर्ने पर्सनल प्रोटेक्टिभ इक्विपमेन्ट (पीपीई) को पनि सरकारले बन्दोवस्त गर्न लागेको समिति स्रोतले जानकारी दियो ।

नेपालमा त्यस्तो सुरक्षा कवच नभएकाले परराष्ट्र मन्त्रालयले चीन सरकारसँग सहायता माग गरेको छ ।

“हामीले चीन सरकारलाई पत्र पठाएर पीपीई माग गरिसकेका छौं । यथाशीघ्र उपलब्ध गराउने वचन पनि पाएका छौं, नेपाल सरकारले छिट्टै त्यस्ता सामग्री ल्याउँछ,” परराष्ट्र मन्त्रालय स्रोतले बाह्रखरीसँग भन्यो ।

मुलुकमा अहिले चालु हालतमा रहेका अस्पतालमा कोरोना सङ्क्रमितको उपचार गर्न मिल्दैन । छुट्टै आइसोलेसन वार्ड स्थापना गरे पनि अस्पतालमा बिरामीकै बाहुल्य रहने भएकाले सङ्क्रमणको जोखिम उच्च हुन्छ र परिस्थिति काबु बाहिर जान सक्छ । 

कोरोनाभाइरस छिटो फैलन सक्ने भएकाले शिक्षण अस्पतालमा २० शय्या, वीरमा २० शय्या गरी आइसोलेसन वार्ड छुट्याउन मिल्दैन । कोरोना सङ्क्रमितलाई उपचार गर्ने चिकित्सक, नर्स छुट्टै व्यवस्था गर्नुपर्ने र नेपालमा त्यससम्बन्धी अनुभवी चिकित्सक, स्वास्थ्यकर्मीसमेत नभएकाले सरकारले चीन सँगै सहायता मागेको समितिले बताएको छ ।

“हामीले प्रारम्भीक चरणमा २० जना चिकित्सकसहितको समूह पठाइदिन भनेका छौं । कोरोना फैलिइहाले २० जनाको समूह निकै अपर्याप्त हो । तथापि, उनीहरूले सुरुवाती अवस्थामा यहाँका चिकित्सक, नर्स आदिलाई तालिम पनि दिनेछन् । उपचार पनि गर्नेछन्,” समितिले आफ्नो तयारी बाह्रखरीलाई जानकारी गरायो ।

कोरोनाको सन्त्रास बढ्दै गएकाले सरकारले सुरुमा तालिमका लागि नेपाली चिकित्सकको समूहलाई चीन पठाउने तयारी गरेको थियो । तर, मौसमी फ्लू, अन्य प्रकोप फैलिएर नेपालमै चिकित्सक अभाव हुने भएकाले चीन नपठाइएको बरु चीनबाटै मगाउन लागिएको रक्षामन्त्रालय स्रोतले भन्यो ।

चन्द्रागिरि नगरपालिकामा रहेको एपीएफ्को अस्पताल कोरोना उपचार केन्द्रमा बदलेपछि सरकारले अरू आवश्यक तयारी पनि गरेको छ । कोरोना सङ्क्रमित बोक्ने एम्बुलेन्सदेखि लिन जाने तालिमप्राप्त कर्मचारीसमेतको प्रबन्ध मिलाउन लागेको समितिले बताएको छ ।

एपीएफको अस्पतालमा समूह छुट्टयाएर १४ दिनसम्म एक समूहलाई खटाउने, समूहमा चिकित्सक, नर्स, अरु स्वास्थ्यकर्मी, सेफ आदि समावेश गर्ने सरकारको तयारी छ ।

१४ दिनपछि त्यो समूहलाई प्रतिस्थापन गरेर अर्को समूह राख्ने र उनीहरूलाई १४ दिन क्वारेन्टाइनमा राख्ने सरकारको तयारी छ ।

“कोरोना सङ्क्रमितको उपचारमा संलग्न रहने चिकित्सक मात्र होइन सेफ, सुरक्षाकर्मी, सरसफाइमा संलग्न कर्मचारीलाई पनि हामी बाह्य सम्पर्कमा रहन दिँदैनौं । कडा सुरक्षा घेराभित्र १४ दिनसम्म अस्पतालमै रहनेछन् । त्यसपछि १४ दिन क्वारेन्टाइनमा राखेर विस्तृत परीक्षणपश्चातमात्रै बाह्य सम्पर्कमा आउन दिइने छ,” रक्षामन्त्रालय स्रोतले भन्यो ।