सोल । अमेरिकी राष्ट्रपति डोनाल्ड ट्रम्पले उत्तर कोरियाली नेता किम जोङलाई निजी रुपमा पत्र लेख्दै सबै मुलुकसँग सुमधुर सम्बन्ध राख्न अपिल गरेका छन् । उनले विश्वले यतिखेर ठूलो महामारीविरुद्ध युद्ध गरिरहेकाले यो लडाईंमा सहयोग गर्न उनलाई अनुरोधसमेत गरेका छन् । यो कुराको पुष्टि किमकी बहिनीले आइतबार गरेकी छन् ।
राष्ट्रपति ट्रम्पले यो पत्र यस्तो समयमा पठाएका छन्, जब उत्तर कोरियाली सप्ताहन्तमा सामरिक हतियार परीक्षण गरेको थियो । विश्वजगत् नै कोरोनाविरुद्धको लडाईं लडिरहेका बखत उसको हतियार परीक्षणलाई लिएर सर्वत्र आलोचना भएको छ ।
कोरियन सेन्ट्रल न्युज एजेन्सीले किमकी बहिनी र सत्तारुढ पार्टीका वरिष्ठ अधिकारी किम यो जोङलाई उद्धृत गर्दै ट्रम्पको पत्रको सराहना गरिएको छ । दुई देशबीच सम्बन्ध सुमधुर बन्न खोज्दै र बिग्रँदै आइरहेको समयमा पत्रका कारण ट्रम्प–किम सम्बन्ध सुध्रिने अपेक्षासमेत गरिएको छ ।
दुई देशबीच सम्बन्ध सुधार हुनुका साथै कोरोनाविरुद्ध सहयोग गर्न पनि अमेरिका तयार रहेको मनसाय पत्रमा रहेको बताइएको छ । पत्रबारे आइतबार साँझसम्म पनि ह्वाइट हाउसले केही बोलेको छैन । एपी