अमेरिका । अमेरिकामा अहिलेसम्म नेपाली समुदायका कसैलाई कोरोनाभाइरस संक्रमण भएको सार्वजनिक नभए पनि यहाँ रहेका नेपालहरु पनि त्रसित छन् ।
स्टोर, ग्यास स्टेशनलगायत विभिन्न क्षेत्रमा अग्रपंक्तिमा नेपाली काम गर्नेको संख्या निकै बढी रहेकाले नेपाली समुदायमा कोरोना संक्रमणको जोमिख भने उच्च छ ।
अमेरिकामा अहिलेसम्म करिब २० हजार कोरोना भाइरस संक्रमित भेटिएका छन् । यो संख्या दैनिक बढ्दो छ । कोरोनाका कारण मृत्यु हुनेको संख्या समाचार तयार पार्दासम्म ३४८ पुगेको छ । नेपाली समुदायको बाक्लो बस्ती रहेका अमेरिकाका प्रमुख सहर अहिले कोरोनावाट बढी प्रभावित छन् ।
अमेरिकामा पनि नेपाली समुदायबीच कोरोना भाइरसका बारेमा विभिन्न हल्ला चलिरहेका छन् ।
केही दिनअघि न्यूयोर्कमा एकजना नेपालीलाई कोरोना भाइरस लागेको हल्ला चल्यो तर, ती नेपालीका आफन्तले पछि यो हल्ला सत्य नभएको र अन्य स्वास्थ्य समस्याले ती नेपाली अस्पताल गएको सार्वजनिक गरेका थिए ।
न्यूयोर्क नेपाली समुदायको सबैभन्दा ठूलो बस्ती भएको क्षेत्र हो । अमेरिकामा सबैभन्दा बढी कोरोना संक्रमित पनि यहीँ भेटिएका छन् । तर, अहिलेसम्म त्यहाँ कुनै नेपाली कोरोनाबाट संक्रमित नभएको बताइएको छ ।
तर अमेरिकामा स्वास्थ्य सम्बन्धी समस्या व्यक्तिगत र गोप्य हुन्छन् ।
परिवारले नभनिकन कसलाई भयो कसलाई भएन त्यो थाहा हुँदैन ।
नेपालीको अर्को ठूलो बस्ती रहेको टेक्ससमा पनि कोरोना भाइरसका विषयमा यस्तै हल्लाहरु चलिरहेका छन् ।
केही दिनअघि टेक्सस डलासको भारतीय स्टोर पटेल ब्रदर्शका कर्मचारी कोरोना भाइरसबाट संक्रमित भएको हल्ला चलेको थियो । तर, उक्त स्टोरले यो सत्य नभएको दाबी गरेको छ ।
शनिबार पनि टेक्ससको ग्यास स्टेशनमा काम गर्ने एकजना युवतीलाई कोरोनाभाइरस संक्रमण भेटिएको हल्ला चलेको छ । तर, यो पनि पुष्टि हुन सकेको छैन ।
अमेरिकामा कोराना भाइरसको चेकजाँचलाई तीव्रता दिइएको छ ।
तर, कति नेपाली समुदायले कतिले जाँच गरेका छन् यो प्रष्ट छैन ।
कोरोना भाइरसको संक्रमण छिटो फैलिने भएकाले समुदायमा कसैलाई देखियो भने यो धेरैमा सर्ने जाखिम भने छ ।
वासिङ्टनस्थित नेपाली दूतावासले शुक्रबार एक अपिल जारी गर्दै नेपाली समुदायलाई सजग र सतर्क हुन आग्रह गरेको छ ।
नेपाली दुुतावासले कोरोना भाइरस संक्रमणका कारण आएको विशेष परिस्थितिले यात्रा अवरुद्ध भएका नेपालीको समस्या समाधानका लागि पहल भइरहेको पनि जनाएको छ ।
राजदूत डा. अर्जुनकुमार कार्कीद्वारा शुक्रबार सार्वजनिक अपिलमा नेपाल जान नपाउँदा ओभरस्टे भएकाहरुको समस्या समाधानका लागि पनि कूटनीतिक पहल भइरहेको उल्लेख छ ।
नेपाल सरकारले कोरोना संक्रमण हुन नदिन नेपालीलाई समेत नेपाल प्रवेश प्रतिबन्ध लगाएको छ ।
दूतावासले आकस्मिक सेवा लिनुपरे टेलिफोन र इमेलवाट सम्पर्क गरेर दूतावासमा समय लिन सकिने पनि जनाएको छ ।
