विराटनगर । विराटनगरमा लुकाई राखेको अवस्थामा ११ हजार थान सर्जिकल मास्क बरामद भएको छ ।
अनुगमन टोलीले विराटनगर महानगरपालिका ९, घोगापैनीस्थित श्री सर्जिइम्पेक्सले लुकाएर राखेको सर्जिकल मास्क बरामद गरेको हो । विराटनगर महानगरपालिकाको टोली आइतबार अनुगमानमा खटिएको थियो ।
बजारमा मास्क र स्यानिटाइजरको कालोबजारी भइरहेको भन्ने जनगुनासो बढेसंगै महानगरले अनुगमन बढाएको हो । अनुगमानमा औषधि व्यवस्था विभाग र प्रहरीसमेत थिए । सर्जिकल सामान र औषधिको थोक विक्रेता श्री सर्जिइम्पेक्सको गोदाममा लुकाएर राखेको ११ हजार थान मास्क बरामद भएको औषधि व्यवस्था विभागका निमित्त प्रमुख सञ्जीव शर्मा कट्टेलले जानकारी दिए ।
कोरोना भाइरस संक्रमणविरुद्ध सर्वसाधारणले प्रयोग गर्ने मास्क र स्यानिटाइजरलाई अत्यावश्यक वस्तुसरह लिइए पनि बढी मूल्यमा बिक्री गर्न लुकाउने प्रवृत्ति बढेको कट्टेलले बताएका छन् । लुकाएर राखेको चारसय हेण्ड स्यानिटाइजर समेत बरामद भएको थियो ।
राजेश अग्रवाल सञ्चालक रहेको श्री सर्जिइम्पेक्सबाट बरामद स्यानिटाइजरमा एमआरपी मूल्यसमेत अस्पष्ट छ ।