काठमाडौं । गायक रामकृष्ण ढकालले कोरोना भाइरसको संक्रमणको जोखिमबाट बच्न सरकारले गरेको आग्रहलाई अक्षरस पालना गर्न आग्रह गरेका छन् । सरकारले नागरिकको स्वास्थ्यका लागि सावधानी अपनाउन गरेको आग्रहलाई सबैले पालना गर्नुपर्नेमा उनको जोड छ ।
सानो लापरवाहीले जिन्दगी नै संकटमा पर्नसक्ने भन्दै सम्भावित जोखिमबाछ होसियार हुन उनले भनेका छन् । “सानो लापरबाहीले ठूलो रोग सर्न सक्छ”, ढकाल आफ्नो फेसबुक पेजमा लेख्छन्, “फूल जस्तो हाम्रो जीवन, ओइलिएर झर्न सक्छ, कोरोना भाइरस बाट सुरक्षित रहौँ ।”
आफू बचौं र अरुलाई पनि बचाउँ भन्दै उनले भीडभाडमा नजान भन्दै घरमै बसेर रोगप्रतिरोधात्मक क्षमता बढाउने तातो तथा तागतिलो खाना खान पनि आग्रह गरेका छन् ।
उनले फुर्सदको समय घरमै बसेर गीतसंगीत सुनेर बिताउन पनि अनुरोध गरेका छन् ।