काठमाडौं । नेपाली क्रिकेट समर्थक समाज (एनसीसीएस) ले जयबहादुर तामाङ (सेते दाइ) लाई आर्थिक सहयोग गरेको छ ।
मिर्गौलाको समस्याका कारण वीर अस्पतालमा उपचार गरिरहेका सेते दाइलाई एनसीसीएसले ५० हजार रुपैयाँ सहयोग गरेको हो । एनसीसीएसले आइतबार वीर अस्पतालमा उनकी पत्नी नीरमायालाई सहयोग हस्तान्तरण गरेको हो ।
सेते दाइ कीर्तिपुरस्थित टीयू अन्तर्राष्ट्रिय क्रिकेट मैदानका कर्मचारी हुन् । उनी पछिल्लो १२ दिनदेखि वीर अस्पतालमा मिर्गौलाको उपचार गराइरहेका छन् । नेपाली क्रिकेट समर्थकहरूको संस्था एनसीसीएसले अभियानको चौथो दिनमा कुल ८७ हजार २८० रुपैयाँ उठेको छ । जसमध्ये ५० हजार आइतबार हस्तान्तरण गरेको हो भने ६ हजार ३५० सीधै बिरामीको बैंक खातामा पठाएको थियो ।