पोखरा । बहुविवाह र जबरजस्ती करणीको आरोपमा पुर्पक्षको लागि कास्की कारागारमा थुनामा रहेका कैदीबन्दी बिहीबार फरार भएका छन् ।
इलाम घर भएका प्रितमान तामाङ कास्की कारागारमा गत माघ २ गतेदेखि पुर्पक्षको लागि थुनामा थिए । उनीमाथि बहुविवाह र जबरजस्ती करणीको मुद्धा छ । पुर्पक्षको लागि कारागार चलान भएका उनको कैद सजाय भने तोकिएको थिए ।
कारागार स्रोतका अनुसार बिहीबार उनलाई स्वास्थ्योपचारको लागि पश्चिमाञ्चल क्षेत्रीय अस्पताल पुर्याइएको थियो । साढे तीन बजेतिर तामाङ अस्पतालकै शौचालयबाट फरार भएका हुन् । सुरक्षाघेरामा अस्पताल पुर्याएतापनि उनी २ जना सुरक्षाकर्मीलाई झुक्याएर भाग्न सफल भए ।
“पिसाब रोकिएपछि हामीले उपचारको लागि अस्पताल लगेका थियौँ, तर शौचालय जाने बहानामा उनी फरार भए,” कारागार स्रोतले भन्यो ।
फरार तामाङको स्थायी घर इलाम हो । उनको खोजी कार्य भइरहेको छ । जिल्ला प्रहरी कार्यालयले हालसम्म उनको पत्ता नलागेको बताएको छ ।
