काठमाडौं । प्रधानमन्त्री तथा मन्त्रिपरिषद्को कार्यालयमा बसेको समितिको बैठकले वैशाख तेस्रास सातासम्म रंगशाला र खेल स्थल बन्द गर्ने निर्णय गरेको छ ।
रक्षामन्त्री ईश्वर पोखरेलको संयोजकत्वमा गठित कोरोना संक्रमण रोकथाम तथा नियन्त्रण उच्चस्तरीय समन्वय समितिको बुधबारको बैठकले वैशाख १८ गतेसम्म रंगशाला र खेल स्थल बन्द गर्ने निर्णय गरेको हो ।
यस निर्णयको अनुगमन गृह मन्त्रालय, संस्कृति, पर्यटन तथा नागरिक उड्डायन मन्त्रालय र सञ्चार तथा सुचना प्रविधि मन्त्रालयले गर्ने जनाएको छ । त्यस्तै २५ जनाभन्दा बढी भेला हुन नपाउने निर्णय गरेको छ ।
मंगलबार मात्रै राष्ट्रिय खेलकुद परिषद् (राखेप) ले एक साताका लागि सम्पूर्ण खेल गतिविधि रोक्न निर्देशन दिएको थियो । राखेपका सदस्य सचिव रमेशकुमार सिलवालको अध्यक्षतामा बसेको बैठकले गरेको निर्णयले एन्फामा जारी ‘बी’ डिभिजन लिग पनि चैत १२ गते सम्मका लागि स्थगित भएको थियो ।
