अभाव र कालोबजारले सताइएको नेपाली समाज हल्ला सजिलै पत्याउँछ तर सरकारको आश्वासनमा विश्वास गर्दैन । धेरै लामो समयदेखि समाजले सरकारलाई विश्वास नगर्ने प्रवृत्ति कायम रहेको छ । अहिले कोरोनाभाइरस (कोभिद – १९)को महामारीको त्रासमा पनि जनताले सरकारको आश्वासन नपत्याएको देखियो । बजारमा खाद्यान्नलगायतका दैनिक उपभोगका वस्तुको अभाव होला र आफूलाई खाँचो परेका बखत किन्न पनि नपाइएला भनेर त्यस्ता सामग्री थुपार्ने होड चलेको छ । फलस्वरूप, कृत्रिम अभाव उत्पन्न गरी कालोबजार गर्न मौका ढुकेर बसेका व्यापारीले जनमानसमा रहेको त्रासको दोहन गरेका छन् । खाना पकाउने ग्यासलगायत केही सामग्रीको सञ्चय बढी हुन थालेको देखेपछि सम्बन्धित मन्त्री स्वयंले जनतालाई आश्वस्त तुल्याउन खोजे । तर, जनताले पत्याएनन् । यसरी जनताले नपत्याएको भने यसपटकमात्र हैन ।

चेर्नोबिल आणविक दुर्घटनापछि नेपाल आयात गरिएको धुलो दूधमा विकिरण छ भन्ने हल्ला चल्यो । त्यसको खण्डनका लागि तत्कालीन सरकारले सबै उपाय अपनायो तर जनताले पत्याएनन् । केही समयसम्म दुग्ध विकास संस्थानको दूधको बहिष्कारै भयो । पहिलो जनआन्दोलनका बेला सरकारले सार्वजनिक बैंकहरूबाट जनताको बचत झिकेर आन्दोलन दबाउन खर्च गर्न लागेको हल्ला चल्यो । आन्दोलनकारीले त्यसलाई आन्दोलन चर्काउने अस्त्रका रूपमा प्रयोग गरे । सरकारले खण्डन गरे पनि जनताले पत्याएनन् । यस्ता अनेकौं घटना छन् । संकट सकिएपछि जनअविश्वासको कारण सरकारले कहिल्यै खोजेन । यस्तै, हल्लाका भरमा बजारको सन्तुलन बिगार्ने गरी उपभोग्य वस्तु थुपार्दा उल्टै महँगी बढेको देखेर पनि जनताले कहिल्यै धैर्य गरेनन् । अहिले पनि त्यही प्रवृत्ति दोहोरिएको हो । सरकार अहिलेसम्म जनमैत्री हुनसकेको छैन । राणा शासनकै ढब र ढंगमा सरकारी संयन्त्रहरू सञ्चालित छन् । कर्मचारीहरू जनताले गर्ने प्रश्नको उत्तर दिनुपर्छ भन्ने ठान्दैनन् । मन्त्रीहरू विज्ञ र विशेषज्ञको राय झन्झटिलो लाग्छ । जनताका गुनासा र सञ्चार माध्यमको प्रश्नमा विपक्षको षड्यन्त्र देख्छन् । 

जनतामा सरकारप्रति विश्वास जगाउने हो भने सबैभन्दा पहिले अविश्वासको कारणको खोजी गर्नुपर्छ । सरकारको अनुगमन संयन्त्र कमजोर भएकैले मात्र बजारमा कृत्रिम अभाव र कालोबजार भएको हैन । जनतामा रहेको सरकारप्रतिको अविश्वास व्यापारीलाई सजाय गर्दैमा घट्ने पनि होइन । यस्तै, पत्याउने आधारको बेलिविस्तारविना मन्त्री वा सचिवले यति महिनालाई पुग्ने सामग्री छ भन्दैमा पनि जनताले विश्वास गर्दैनन् । सरकारको कार्यशैली अहिलेसम्म पूर्वक्रियाशील देखिएको पनि छैन । यी सबैको कारण खोजेर निराकरण गर्न र अब पहिलेको अवस्था नदोहोरिने विश्वास जनतामा पार्न सकेमात्र सरकारप्रति जनतामा विश्वास जाग्नेछ । कोरोनभाइरसको सामना गर्न सरकारलाई जनसहयोग अपरिहार्य हुन्छ । यसका लागि जनताको मनमा रहेको अविश्वास हटाउनु पनि उत्तिकै जरुरी देखिन्छ । यसैले सरकारले बनाउने रणनीतिमा जनविश्वास जगाउने विषयमा पनि ध्यान पुगोस् ।